Ona giornada de fiocca
Achille Zambelli (1823-1902)
Ona giornada de fiocca
L'altr'ann, quand è vegnuu quella gran fiocca,
ch'ha quattaa de bombas tutta Milan,
ona sciorina, tegnend sald la socca
e cont l'ombrella averta in l'altra man
l'ha ciappaa ona tremenda scarligada
borland longa e destesa su la strada.
Mi sont cors subet per tiralla su...
ma lee, in gamba e cont duu œucc de stria,
"Grazie (la dis) gh'hoo pù bisogn de lù!
Non hoo faa che on error de ortografia...
(e me rincress che lù l'abbia veduu)
inveci dei duu Pee... ho miss giò el Quu!"
E, intant che la scorliva la vestina,
ridend propri de cœur del sò bell cas,
l'ha ciappaa el vol come ona passarina,
lassandem lì mincion cont tant de nas
a conclud, che nun omen gh'emm gran tort
quand crédem i donn debol e nun fort!