On sogn de mett al lott
Gioann Ventura (1801-1869)
On sogn de mett al lott
Che sogn, sura Teresa! Oh, che bell sogn!
Me pariva de vègh quàtter marì!
E me pariva de vedè 'l mè Togn
tutt content anca lù l'istess de mì!
E, senza gelosij, senza rangogn,
m'era duvis ch'el me disess inscì:
"Minga quàtter ma vint, se fa besogn!
Quell de fà sciosc l'è 'l fort di noster dì!"
Cosse ne dis? A lee, sura Teresa!
No ghe par ciar e nett de vedègh dent
vun de quij terna de strappà l'impresa?
Chi gh'è 'l quàtter, gh'è 'l vint; ma, el pù patent,
per fortuna in grand cont poca spesa,
l'è quell bell nùmer del marì content!