On moment de nostalgia
Giovanni Bertacchi
On moment de nostalgia
Quand Ciavena la se inoccia
sü, tra mez ai sò montagn,
cont quii sò gandon de rocia
che stravaca in di campagn ;
quand de quest a quell paes
i se ciamen tutti i ges,
mi, sbandii de Lombardia
dal decrett del mè destin,
cerchi on post in tratoría,
cerchi el fœugh d’on quai camin,
e stoo lì a guardà el passaa
cont i œugg imbambolaa
Eco; propi in 'sto moment
son chi, dent in d'ona stanza,
bell al cold, coi sentiment
tutt velaa de lontananza
Cossa gh'è 'l che viv o mœur
in l' inverno del mè cœur?
Fœura el fiòca: in sül velari
che vegn giò su tecc e strad,
come in fond a on gran scenari
se profila i mè vallad.
Forsi a st'ora, su a Ciavena,
sonarann per la novena.
O novena de Natal,
tanto veggia e semper nœuva,
par che 'l cel de la mia vall
a sentitt al se comœuva;
par che propi el sia là su
el presepi de Gesù.
Car presepi, me regordi!
Coi compagn, finii la scœula,
se correva tucc d’acordi
su per Prost e per Capiœula
a cercà, fra i erboi matt,
ori, mufa e spongiaratt.
Pœu in di stuv l'era on defà
a trà insem la scena viva:
gh’era i pascoi, gh’era i cà,
gh’era i sonadô de piva,
e 'l Bambin, che fa la nana
tra i dò besti, in la capana.
Quanti rob a nun bastruch
me parlava in questa scena,
fada sora a quatter sciuch
longo i dì de la novena!
Ghe sentivom el riciam
de la fed di noster mam.
Ne 'l vegniva pœu el gran dì
che in quel quader inocent
se vedeva a comparì
i tre Magi de l'orient,
i trii re: Gaspar, Melchiorr,
Baldassar, cont i tesor.
In la nocc quii re inscì bei,
filand via a vun a vun,
i portava sui camei
un quaicoss anca per nun...
Nun a scur, coi œugg avert,
trepignavom sott ai covert.
E 'l dì dopo on carnevaa
tra tucc nun compagn de giœugh:
magattei, trombett, soldaa,
cont i esempi arent al fœugh.
Festa granda, incoronada
d’ona zena prelibada.
Ma, pœu dopo, che magon
tornà quiett sot ai lenzœu!
Più vin dolz, più panetton,
tutt finii, i mè pover fiœu...
Doman... scœula! Epifania
tutt'i fest je porta via!