Ofpul smalik lubäkik
Lovepol fa Thaddäus Devidé-Wien.
Vöno vom äbinof, laböl ofpulili lebalik, kel äbinof vemo smalik e neledik e boso difik de cils votik, ibo, ven mot äsegolof ko of, mens ästopoms, älogedoms cili e äsagoms bosi loviko.
If ofpul smalik täno äsäkof moti oka, kikod mens älenlogoms ofi so seledniko, mot ägepükof alina: »Bi labol klotili nulik so lejönik.«
Täno ofpulil äbinof kotenik; yed ven igekömofs domo, mot äsumof ofsonili in lams, äkidof ofi denuamo e äsagof: »O ladalanel löfik, svidik! kis sötos vedön de ol, kiüp obinob edeilöl?«
Pos tim anik mot emalädof süpito e edeilof del zülid.
Pos yel bal fat ematom vomi votik, jönikum, yunikum e liegikum ka ofmatel balid, ab no äbinof so gudik.
E ofpul smalik - du tim lölik sis mot oka ideilof - isiedof in cem su söf, del alik des gödel jü vendel; ibo nek äbinom, kel ävilom spatön ko of. Ivedof nog neledikum e leno iglofof yel lätik.
Ven mot nulik äkömof in dom, cil ätikom: »Nu ospatob denuo, da zif, in solalit su vegs jönik, kiöp smabims e flols jönik stanoms e mens mödik peklotöl jöniko binoms!«
Ab mot nulik no ädukof ofi sagöl: »Vö! no binol visedik! Kisi mens ätikomsöv, if älogoms-la obi ko ol? Vo, binol löliko lubäkik! Cils lubäkik nevelo spatoms; ats steboms ai domo!«
Foviko ofpul smalik evedof löliko stilik e sosus mot nulik ilüvof domi, exänof su stul e elenlo of oki in lok: e velato, äbinof lubäkik, vemo lubäkik!
Täno ämemof lubäki, meditöl: »Kis binos ba linedo? vö, bos mutos binön in lubäk somik?« E hitatim efegolom e ven nifatim ikömom, ofpul smalik äbinof nog neledikum, e ivedof so fibik, das no fovo äkanof siadön oki su söf, ab ämutof seistön in bed. E ven nifaglökafs itovoms tipis glünik balid okas, mot gudik bäledik ekömof in neit sembal al ofpul e ekonof ofe, liko golüdik e magifik binos in sül. Gödelo ofpul smalik edeilof. Ven ofpul smalik pisepof, lanel ko svanaflitads vietik, gletik eflitom dono se sül, esiadom oki nebü sep e enokom len at, äsif äbinom yan.
Täno ofpul smalik ekömof se sep e lanel ekonom ofe, das ikömom al dukön ofi al mot ofa in sül.
Ofpul smalik esäkof mükiko: »va cils lubäkik kömoms in sül? leno kanob kapälön atosi, bi in sül binos so jönik e cädik!«
Yed lanel egepükom: O cil löfik, gudik! leno binol fovo lubäkik! e efinedom bäki ofa me nam oka vietik.
E lubäk gagik elefalom äsliko jal ninvagik gletik; e kis äbinos ino?
Lanelaflitads tel, vietik, magifik!
Espanof atis, äsif ikanof flitön ya egelo, e eflitof ko lanel da solanid suso in sül, al mot oka gudik bäledik.
Se Volapük: Gased al pakam Volapüka 1894, Nüm: 2, Pads: 5-6.