Ofigian pecütöl

From Wikisource
Jump to navigation Jump to search
POPAMÄR SVEDÄNIK.


Ofgian bäledik e nejönik älödof büfü yels mödik in fot sembal. Älöfof mödo miti de cils smalik, kelis äbätof al ok me ligeds, kels palöfoms fa cils. Na igetof omis, älabof kösömi loetön e fidön omis.


Man pöfik älödom nilo. Älabom soni e ofsoni, e bi äbinom vemo pöfik, no älaboms bosi al fidön, sikodo äsedom cilis okik al fot al plökön bälis. Cils ägoloms e äkömoms al ludom, in kel ofgian bäledik älödof. Keks ligedik äsibinoms su nuf, e pul ägolom uso. Cils äbinoms pötütik e äviloms viliko labön dili de ats, ab ofgian älilof, das ek äbinom su nuf e äsäkof: "Kim binom lä keks obik?" "Te böd smalik," pul ägesagom. "Fidolöd ko püd," ofgian äsagof. Pul äsumom kekis anik e ägolom al ofblod al fidön omis.


Ägolom poso al ludom ofgiana al deblinön mödikumis, ab ofbäledan älilof denu omi e äsäkof: "Kim binom lä keks obik!" "Te böd smalik, te böd smalik," pul ägesagom, ab ofpul ävokof al pul, e ofgian älilof täno, das cils äbinos. Ofgian ägleipof foviko omis sagöl: "Äbinols böds jönik, löfäbs obik - ovedols loets gudik!" Äsäkof ofpule, liko mot ofik ämekof ven ämitelof svini. "Spinof svini me neif," ofpul ägesagof. "Omitelob somo olis," ofgian äsagof. "Ab mot obik pinof büo omis," pul änotedom. "Odunob somo," ofgian äsagof, "ab kisi givof omes al fidön?"


"Nötakeris e miligi svidik."


"Ogetols i nötakeris e miligi svidik," äfinof, e äninkikof cilis in lucem smalik.


Pos dels anik ägolof al logön va cils äbinoms pinik.


"Jonolsöd finedis olsik!" ofgian äbüdof. Pul äjonom dili de boad e ofbäledan äkötof in at. "No, no," ofgian älusagof, "no binoms nogo pinik."


Pos dels anik ägolof denu al logön, va cils äbinoms säto pinik. Äbüdof omes jonön finedis okas. Pul äjonom atna läfili. Ofgian äkötof in at e äcedof das abinoms[1] nü säto pinik.


Ämekof fili in bakafön e äbüdof ciles siadön okis su bakab.


Pul äsiadom oki su at, ab äsimulom falön, ven ätovof bakabi al jedön omi in bakafön. Pul äbegom plüto ofe jonön ome liko odunom. Ofgian äsiadof oki täno su bakab, ab pul äjedom in timil at ofgiana in bakafön e äkikom yani bakaföna.


Cils ävedoms labels de lab valik ofgiana, ab nek elilom u elogom siso omis.



Finspong, Svedän.

AXEL MALM
Se "Gased Bevünetik."



NOETS. (Vükifonät)

  1. Bükapök; pla: äbinoms.



Se Kosmopolan 1891, Nüm: 1, Pads: 9-10.