O Difendeint, adess ch'at sè dotor

Sirin Caraa (1794-1848)‎

O Difendeint, adess ch'at sè dotor

GRAFIA ORIGINAL

O Defendeint, adess ch'at sè dotor
at cradarissat mai d'avè finì?
At cradarissat mai parchè 't sè on sior
da studià pu, mangià, bev, e dormì?

No, car al mè Sacchin, at sè in error,
se col tò grand at peinsat da stà lì:
agh va fadiga, merit, e sudor
par fass on om com veui ch'at fagat tì.

Va stracat no da fà passà di tom
legia codiz, e libar a monton
par podè fà dal béi ai galatom.

E se mai gniss on quai beco cornù
a fass difend, dì ch'at sè no on birbon,
e ch'at sè Difendeint, ma no per lu.
GRAFIA PAVESA MODERNA


O Defendéint, ädès ch'ät sè dutur
ät crädärìsät mai d'ävè finì?
Ät crädärìsät mai pärchè 't sè un siur
dä stüdià pü, mängià, bév, e durmì?

Nò, car äl mè Sächìn, ät sè in erùr,
se cul tò gränd ät péinsät dä stà lì:
ägh va fädigä, mérit e südùr
pär fà un òm cum vöi ch'ät fàgät tì.

Va stracät nò dä fà päsà di tòm
légiä còdiš e libär a muntón
pär pudè fà däl béi äi gäläntòm.

E se mai gnis un quai bècu curnü
ä fàs difénd, dì ch'ät sè nò un birbón,
e ch'ät sè Difendéint, ma nò pär lü.
GRAFIA COMUNA

O Defendent, adess che te see dotor
te credaresset mai d'avé finid?
Te credaresset mai, perchè te see un scior
de studià pu, mangià, bever e dormì?

Nò, cara el mè Sachin, te see in eror
se col tò grand te penset de stà lì:
ghe va fadiga, meret e sudor
per fà un om com vœuj che te faghet tì.

Va', strachet nò de fà passà dei tom,
lesgia codes e liber a monton
per podé fà del ben ai galantom.

E se mai gniss un quai beco cornud
a fass defender, di' che te see nò un birbon,
e che te see Defendent, ma nò per lu.