Nutrni spěwarjo

nadpis	Nutrni spěwarjo
awtor	Jan Arnošt Smoler
lěto
žórło	texty.citanka.cz
licenca	public domain
nota	stary prawopis

Sta so pak, zo knjez Khrystus a swjaty Pětr po swjeće khodźeštaj. A wonaj přińdźeštaj do wjeski, hdźež w jednym domje tak rjenje spěwachu. A knjez Khrystus wosta stojo, zo by posłuchał, swjaty pětr pak dale dźěše. A jako wón kusk dale přińdźe, powohladny so, a knjez Khrystus tam hišće stoješe. Swjaty Pětr pak přeco dale dźěše. A jako won kusk dale přińdźe, powohladny so zasy, a knjez Khrystus tam přeco stoješe. Swjaty Pětr pak tola hišće přeco dale dźěše. A jako wón kusk dale pŕińdźe, powohladny so hišće zasy a knjez Khrystus tam hišće přeco stoješe a posłuchaše. Tuž wobroći so swjaty Pětr a pŕińdźe zasy k tej khěži a tam jara rjenje pěsnički spěwachu. A jako běštaj khwilu posłuchałoj, dźěštaj dale a přińdźeštaj k druhemu domu. Tam tež spěwachu. A swjaty Pětr wosta stojo, zo by posłuchał, knjez Khrystus pak přeco dale dźěše. Tuž dźěše swjaty Pětr tež dale a dźiwaše so wulcyšnje. A knjez Khrystus praješe: što dźiwaš so tak wulcyšnje? Swjaty Pětr pak dźěše: Ja so tak wulcyšnje dźiwam, zo ty tam stojo wosta, hdźež pěsnički spěwachu a tu nimo dźeš, hdźež kěrluše spěwaju. Duž rjekny knjez Khrystus: Mój luby swjaty Pětro, tam spěwachu pěsnički, ale to ze wšej nutrnosću, tu spěwaju kěrluše, ale to beze wšeje nutrnosće.