No sap chantar qui'l son no di

From Wikisource
Jump to navigation Jump to search
please do not remove empty parameters (see the template documentation).
No sap chantar qui'l son no di
by Jaufre Rudel

No sap chantar qui so non di,
Ni vers trobar qui motz no fa,
Ni conois de rima co·s va
Si razo non enten en si.
Mas lo mieus chans comens' aissi
Com plus l'auziretz, mais valra, a, a.

Nuils hom no·s meravill de mi
S’ieu am so que ja no·m veira,
Que·l cor joi d'autr' amor non ha
Mas de cela qu'ieu anc no vi,
Ni per nuill ioi aitan no ri,
E no sai quals bes m'en venra, a, a.

Colps de joi me fer, que m'ausi,
Et ponha d'amor que·m sostra
La carn don lo cors magrira;
Et anc mais tan greu no·m feri,
Ni per nuill colp tan no langui,
Quar no cove ni no s'esca, a, a.

Anc tan suau no m' adurmi
Mos esperitz tost no fos la,
Ni tan d'ira non ac de sa
Mos cors ades no fos aqui:
E quan mi resveill al mati
Totz mos bos sabers mi desva, a, a.

Ben sai c'anc de lei no·m jauzi,
Ni ja de mi no·s jauzira,
Ni per son amic no·m tenra
Ni coven no·m fara de si;
Anc no·m dis ver ni no·m menti
E no sai si ja s'o fara, a, a.

Bos es lo vers, qu'anc no·i falhi,
E tot so que·i es ben esta;
E sel que de mi l'apenra
Gart se no·l franha ni·l pessi;
Car si l'auran en Caersi
En Bertrans e·l coms en Tolza, a, a.

Bos es lo vers, e faran hi
Calque re don hom chantara.