No m’ domandè de grazia donde stò
No m’ domandè de grazia donde stò
che maledetto sia stó in d’ona cà
dov’ no poss dì né nogg mai repossà
del fregg e del frecass e del spuzzó;
ona cà sott i copp che quand ghe vó
gh’hó semper scient basij da inumerà,
dò camer dall’invers dov’ mai no gh’dà
da nessun temp dell’ann on pó de só;
par mezz ai beccarij, par mezz al foss
e se sent i becchè co’ i sû folgasg
che van semper taiand carn’e baloss,
dond se ved nomà donn che lava strasg;
de più andà ai fenester mai no poss
che no veda a voià sempr’on pettasg;
su i scar millj spegasg
de merda d’i fancitt d’i mé visin,
che caghen anch d’i vûlt sott al camin.
In l’ora del mattin
gh’hó pû sempr’on concert de resegott,
de carr e de carret on terremott.
Ma quest el è nagott
respett al ciass che fan i barchirû
i vedei de becché co’ i vacch e i bû.
Tra l’olter gh’è on fiû
d’on vesin che no’m lassa mai dormì
ch’al rasgia dalla sira in fin’ al dì.
Ma cazz mì vûi fusgì
e portà via ona nogg la paia e’l legg:
malett sia ‘l patron, la cà co’l tegg.