No gelogolöd!

Fa ‚C. P. Tiele‛. (Tradutod libik fa ‚Rinacil‛.)

Logolöd no pödio, ab foo!
Pestöpädöl dub mied lenonik,
mutol ga neföro lüdön büo!
Sevolöd! Fo ol ün fütür nesevädik
seatons lib jönik, daben e lif glorik,
ab nonikna ünü tim pasetik

* * *

Foologolöd, ab no pödio!
Lemödiks mens, fopik, stupik,
nekotenik dö tim presenik, do
binon fulik me töbs mödik,
sukons ünü paset lefagikün
tumyeli de lib e läb gretikün.

* * *

No logolöd pödio, ab foo!
Ga te fütür binon fmonanot olik.
Paglömonös valikos, nog stadöl pödo.
Föfiö! Dub komip leneföro fenik.
Gleipolöd te ko mäpüd künik!
Lü ol leduton valikos binöl föfik.

Se Volapükagased pro Nedänapükans 1936, Nüm: 2, Pad: 13.