Njezapomnička na row Václava Hanki
Wjelespytany a wjeleslawny,
sy so swjecil jako wótčinc nam,
stajnje jako Slowjan zjawny
sy so wšudze wuznal k Slowjanam,
a tež serbstwa njejsy nihdy zapomnil,
sy tež Serbam swoje mocy poswjecil.
Hač tež zawisc skradzna, jědowata
na tebje so hrózbnje měrješe,
hač tež njepřecelnosc njewustata
kosydla za tebje kladzeše:
Před ničim so njejsy ženje postróžil,
z wójnu sprawnej sy wšo njepřecelstwo zbil.
Twojej wobstajnosce přiklad krasny
procowanje naše posylni,
twojej dzělawosce blyšc pak jasny
naše woči w dzělach rozjasni:
A duž tak tež Serbow mala črjódzička
w Lužicach na tebje dzaknje spomina.
- Author: Michał Hórnik (public domain)
- Source: http://www.rukopisy-rkz.cz/rkz/gagan/jag/rukopisy/osobnost/hanka/hornik.htm