Nani-nani
Dorńi-ńi, scumpulu ali mami,
Dorńi-ńi alba mea fidani,
Pânâ mâni dimineaţâ
Fă-ńi tu niţâ „nani-nani”.
Fă-ńi tu niţâ „nani-nani”,
Câ i noapti şi-arâcoari
Ş-ciuciuruşili ţâ-ngl’eaţâ,
Ocl’iu laiu, ocl’iu di soari.
Ningâ capu aveagl’i mama
Nidurńitâ, ca şindani,
Pânâ somnulu si-ńi ti furâ,
S-facâ ńiclu „nani-nani”.
Ncl’idi ocl’il’i ca di anghilu,
Scumpa mea mârgâritari,
Ş-dorńi-ńi somnu fârâ yisi
Pânʼ si-ńi creşti gioni mari.
Pânʼ si-ńi creşti gioni mari,
Chiparişu, cu steaua-n cheptu,
S-plângâ featili di vreari
Tr-ali mami hil’iu aleptu...
Va si-ńi creşti caleşu ca tata,
Nalt la trupu, muşatu la faţâ,
Ca icoanâ zugrâvsitâ,
Ca luţeafiru di dimneaţâ.
Dorńi-ńi, albulu ali mami,
Dorńi-ńi, ńica mea fidani,
Ca trandafilâ muşatâ
Fă-ńi tu niţâ „nani-nani”.
Fă-ńi tu niţâ „nani-nani”,
Câ i noapti şi-arâcoari,
Şi-ńi ţâ-ngl’eaţâ-a tali pati,
Mirginosu ocl’iu di soari...