Nœuva canzonetta dei tulipan
Nœuva canzonetta dei tulipan
NŒUVA CANZONETTA DEI TULIPAN
SU LE MISERIE DE QUEST'ANN
(de Luis Prina, 1870 ca.)
Stemm su alegher, o cara la mè gent
che gh'emm reson de vess content:
ris, forment e melegon
n'emm faa giò di gran monton
e anca l'uga n'emm fada a brazz
n'emm faa giò di gran navasc,
caneva, lin, zuccher e caffè,
ma per pagà i agravi l'è minga assee.
Gh'aveven reson al temp di tulipan
a dimm de uniss tutt nun italian
perchè se staven chì i ducca e i zuccon
i diseven che i me mangiaven a boccon;
adess gh'emm del guadagn in man
a se femm scior nun italian.
Comanda i 'talian, i todesch a gh'inn pu,
ma 'l pan bianch al chilo l'è cinquantaduu.
E pœu in sto secol gh'è pu de cojon,
a se ved semper di nœuv invenzion,
se ved el telegrafo, i macchin de filà,
la fotografia, el gaz e i strad ferraa.
A inn tutt inventaa dai talenton,
ma l'è che inn sparii i marenghin e napolion,
perchè adess se marcia come a Sparta,
allora andava el coramm, adess la carta.
L'è ona bella robba perchè per i città
a se sent pu a taccà lit nè a bravà.
Col dì "Ehi scior Antoni, ehi lu scior Giuseppin"
el cala quatter gran el sò marenghin.
No l'è minga vera, che me scusen i cojon,
se daven di paroll e di s'giaffon,
ma adess i contratt je fann senza bravà,
i ciappa i bigliett de cent tutt strasciaa.
Donca, stemm alegher, o cara i mè talian,
che gh'emm finii de vedè marscì el gran;
almen adess coi vagon a vapor
el se ferma in Italia gnanca duu or.
L'èvera che in st'estaa ghe sarà de sbadaggià
con tutt la robba cara e pocch de lavorà,
ma me resterà la bella consolazion
che creparemm minga de l'indigestion.
Adess chi sta ben inn i milionari,
che ghe van ben tutt i sò afari,
ma in quant ai fittavol e ai mezz sciorett
se vœuren fà bona figura ghe tocca tegn strett
perchè ai fittavol gh'hann cressuu el fitt
e lor strangólen i paisan e i poveritt;
e i mezz sciorett che inn tropp agravaa
fan lavorà l'artista e poden minga pagà.
Ma el motiv a in vott o nœuv scioron
che menen el rost e fan di confusion,
i me dann d'intend che con Romma gh'hann la guerra,
intant el raccolt el va in Francia e in Inghilterra.
De chì va via la granaglia e el bestiamm
e chì in Italia ghe resta la famm;
questà l'è la bondanza, non l'avii capida,
che m'hann portaa i sciori de l'Italia unida.
Donca stee alegher, non stemmegh a pensà,
che vegnerà el moment che la se voltarà.
Vegnerà el moment de stà in alegria
e i Frances de Romma i anderann via,
ma adess gh'è denter el papà di gaj
che tegn i 'talian come tanti pappagaj;
vegnerà el moment che la se voltarà:
staremm ben tutti, ma quand saremm crepaa.