Muls lul lä Moritänels tevik

From Wikisource
Jump to navigation Jump to search

Sevon das ningolam in ninlän Marokäna panedalom plo tävels yulopik. Dil sulüdik limepäna at palödom fa Moritänels tevik, penekulivöl e lezunik, kels mölodoms melelis penafapölüdöl len jols nelotadik omas.


Flentel yunik, söl Camille Douls, kel älabom lifayelis telsetel, idesänom davestigön läni at. Pos eblüfön neplöpo, mogolöl se Tanger, rivön plovinis Sus e Uad-Nun, ägolom al nisuls Canarias. Letöbiko, ädagetom das fitels anik zifa Areciffe, in nisul Lanzarote, länoms omi len jol Fikopa.


Län seistöl visü nisuls Canarias padugonom fa Moritänels tevik Ulad-Delim kels binoms lapinels vemo padledöl. Söl Douls, paklotöl äs canel räbänik älabom bogis tel canas e ädesidom das klödon das äbinom slamel penafapölüdöl.


Nafil sembal älänom omik, beginü balul 1887, len kep Garnet, bevü Rio de Oro e kep Bojador. Na fitels ämotävoms, davestigel lanimik, esävöl bogis okik in klifs, ägolom bivedo da nekulivöp. Pos stepadüps anik, äkolkömom Moritänelis fol kelis äglidom slamiko, vipöl Godapüdi omes.


Plas gepükön ome, äfäloms omi, ätanoms namis omik e äblekoms tel de tuts omik, noköl omis me gleipöp däga sembal.


Moritänels, pos edeklotön täveli e etifön moni omik, ädesänoms funön e jedön omi in mel; ab cif sembal, penemöl Ibrahim, kel äkömom täno, äjelom täveli e äbüdom das polon omi in tened okik.


Söl Douls, kel änelümom levemüno, ädemanom vati. Jipul, panemöl Eliaziz äblinof vati ome in bovil boadik. Niels de Ibrahim äkokömoms su tened al xämön täveli. Äsagom omes das äbinom slamel.


Ägepükoms:


- Slamels no kömoms in län obsik melo.


Täno äpladoms tanis lelik zi futs omik.


Del suköl, söl Douls, esagöl al Ibrahim das ilüvom bogis canas len melajol, pätanom su kämel sembal e Moritänels valik, mens, voms e cils, äkopanoms omi al sükön bogis kels päblekoms e pälapinoms suno. Sosus cans valik päsumoms e du Ibrahim ifagom oki boso, mens fol äbunoms su tävel flentik, äpladoms stofi su mud omik, e, esöpöl hogi in sab, äsepoms omi jü nökeb.


Läbo, söl Douls äplöpom mopladön stofi e äsevokom deviko. Ibrahim ägekömom al libön omi.


Pos dels mödumik, flentel pädukom komü Mel-Aynin, cif veütik kel, du yel büfik, isedom mölodelis al funön tävelis spänik Quiroga e Cervera, kels ätävoms in Adrar. Te fug spidik isavom spänelis tel at.


Mel-Aynin älabom cödatadi jafön milagis. Äsagom das ilesustanom jikämeli sembal. Äsäkom flentele:


- Li-nolol Fatiha? (plek slamik).


At äsagom pleki.


- Mosumolsöd lelatanis se man at, cif äsagom, binom slamel legik.


Yed Moritänels no äbinoms nog pesuadöl. Äsagoms:


- Cif, kel polöm[1] nevelo, äpölom atna.


Ädukoms söli Douls komü man sembal kel äbinom Hadj, o. b. kel ilefulom godatävi al Mekka. Äbinom bäledan lestimlik e meiladik. Äxämom täveli e äsagom:


- Binom tükänel!


Äplänom täno das, du tävs okik, idalogom tükänelis kels äbinoms löliko sümik.


Pos cödat at ämosumon lelatanis söla Douls, ägivon jipasklini ome e päcedom fovo as blod sembal.


Du muls lul, flentel yunik älifom ko Moritänels, dilsumöl lifabiti omsik e xämöl südodis omas. Del sembal, kopanels tävela älegleipoms karavani pekosiadöl dub mens 30 voms 10 e cils mödumik e kämels 48.


Pos düp bal mens 25 päfunoms, votiks ifugoms, voms e cils pädedukoms as slafs.


Ibrahim, kel ivedom gleflen söla Douls, ädesidom gevön jisoni okik ome as jimatel, ab äflagom das lüson füdetik oka koblinom kämelis vel as matagiv.


- Labedob nosi, yunel äsagom, bi etifon valikosi obe ven ekömob in lät at; yed, if ädalol-la obe motävön al län obik, Algerän, ägekömoböv ko kämels vel e mödikums sägo.


Pos täv al zif Tinduf diseinü salön skinis jipas e goladilas, matapömet söla Douls ko Eliaziz, jison de Ibrahim, päzelom zeliko. Äfunon jipis fol, äkaniton, ädanüdon, sägo äpükaton! Del suköl, flentel yunik ämotävom lüodü Glimin, glezif de plovin Uad-Nun pekopanöl fa pösods 20 e kämels 35.


Etakedöl du dels mödumik in zif at, tävel äfovom tävi nolüvedo. Ädugolom plovini Sus e ärivom Marrakech, bal de glezifs limepäna.


Söl Douls äklödom dledön nosi in zif pevisitöl ofeno fa yulopans. Sir Kirby Green, legatel nelijik, äbinom uso sis dels anik ko tüdels mödumik. Flentel ekolkömöl nelijeli yunik, pälesevom as kritel e päninfanübom.


Läbo, danü dünavil beljänela sembal kel älödom in Marrakech, Sir Kirby Green penunöl, ävisitom limepi e ädagetom lifi pefanela.


Söl Douls egekömom in Flentän, ab sosus utakedom de töbs e fens okik, desänom denumotävön suno al davestigön Sahara'.


NOETS. (Vükifonät)

  1. Bükapöm; pla: pölom.



Se Volapükabled Tälik 1889, Nüm: 15, Pads: 115-116.