Matrimoni d'amor
Togn Ghislanzon (1824-1893)
Matrimoni d'amor
I.
La sura Peppa
la gh'à el nas gross;
la gh'è la geppa
la gh'à trii goss;
crappa pelada,
bocca de sciatt,
basletta orlada
de pel de ratt!
No stela a guardà!
No stela a toccà!
No stela a seccà!
Lassèla passà!
La gh'à del pelter, la cerca marì....
la sura Peppa la vuj sposà mì!
II.
La sura Betta
del fondeghee
quanto a basletta,
la stà no indree!
L'è grassa e nana;
su la soa pell,
gh'è ona collana
de vint maghell.
No stela a guardà!
No stela a toccà!
No stela a seccà!
Lassèla passà!
La gh'à del pelter, la cerca marì....
la sura Peppa la vuj sposà mì!
III.
La sura Cecca
l'è on accident!
L'è longa e secca!
L'è senza dent!
E, a quij che passa,
la fa el cerin,
guardand su l'assa
di formaggin!
No stela a guardà!
No stela a toccà!
No stela a seccà!
Lassèla passà!
La gh'à del pelter, la cerca marì....
la sura Peppa la vuj sposà mì!
IV.
Ma quella Pina...
quij bei oggitt!
Quella bocchina...
quij car basitt!
All'inferno la Peppa e la Betta!
All'inferno i maghell e i trii goss!
L'è anmò mej fa l'amor in bolletta,
che tirass de quij cancher adoss!