Maruxina

by Fabriciano González García

Maruxina  (1925)  by Fabriciano González García

I
En pruno á la cimero
Fuxí pa Rebollada
Por ver la mió roxina,
La mió roxa del alma,
La neña más melguera
De toa la montaña;
Por ver á Maruxina
Fuxí pa Rebollada,
La Maruxina roxa,
La Maruxina blanca,
La que los praos allegra
Al tríalos de pasada,
Pos failos cuayar flores
En onde pon la planta.
Yo vila y encariela
Un xueves en Llaviana,
Que yera lo que había
Que ver n' aquella plaza;
La xente del mercau
Volvíase á miralla,
Les moces cubiciando
El bixu de so cara
Allegre y candialina,
Que yera una monada;
Los mozos apostando
Por ver quien la trabara
Y á vino y casadielles
Dimpués la convidaban.
Yo mialma allorié al vella
Porque frayóme l' alma
So palmiquín garbosu
Que artera ximielgaba
Y so guedeya de oro
Cayida so la ' spalda
Tan llucia y pruyidora
Y tan ensortiyada
Que un anxelín escurro
Más chusca non la gasta.
Más cebellaes se dieron
Por mor de la rapaza
Los mozos en ' es fiestes
Si entrabá ella á la danza,
Qu' un campu de barbechu
Da frebes n' a toñada;
Y xuro, non lo extraño
Que por enxareyala
Del deu moñín y ceo
Cozcase con galbana
Cabo illa al són són tienru
Del cántigu la danza
Y echar un ixuxús,
Qu' atrone l' arrodiada
Merezca bien la pena
Si por custión ye, armala,
Ó andar á barganazos
Co 'l guapu que la ' ntama
Por ver cual más apurre
Y va co la chavala
De gallu quintaneru
Cudiándola hasta casa.

II
Por ver á Maruxina,
Por ver la mió galana,
Y echai al vella, tienru,
Dalguna enfilandrada,
Pa 'l monte fuxí un día
Al enriscar el alba;
Yera d' Abril floridu
La Pascua ya pasada,
Los praos arrecendíen
A espliegu y hortelana
Y verbenaben flores
Qu' ha pocu les ruciara
De pelres y rubises,
El llantu I' alborada;
Miraba yo á lo lloñe
Fumiar una cabaña,
Un rebañín d' oveyes,
Trepando hacia una campa,
Y á unes llavadores
Tendiendo la colada,
Y allá ' sclucando' n tientes
De llau de la montaña
La brisa zalamera,
Amorosica y blandía
Trafame al oídu,
Traía ó sonsañaba,
La esquila del ganao
Cierrau en 'a mayada,
D' un pastorín gociosu
El toque la xiblata,
El dolce bulle, bulle
De la xentil fontana
Qu' asculta ente la sebe
Con xunclos y espadaña
Faluca gasayosa
Con pómpares de plata;
Y de la carbayera
D' afechu m' alloriaba
Co ' l cántigu melgueru
Del paxarín del alba
Que acasu sos amores
Entós gorgolitiaba.
Tamién el corazón
Diba salta que salta,
Faciendo allá 'l so modu
Mil dolces comparancias.
¡ Qué guapu yera 'l mundo !
¡ Qué grande Rebollada !
Pero perguapa yera
Sin pizca d' aloyanza,
La reina del fembrío,
El sol de la quintana,
Mió roxa Maruxina,
Mió Maruxina blanca,
La de melgueres rises,
La que al andar esnala
Como una ' scapitina,
Como una culipava.
¿ Qué pinten al par della
Les flores de la campa,
Si envidia sos colores
La mesma flor del agua ?
¡ Nin qué cancallos tienros
Buruyará galana
La fonte faladora,
Ni 'l paxarín del alba
Pa 'l qu' una vez siquiera
Con ella platicara,
Si más engañaora
Non ye delguna xana,
Pos tien en gorgoberu
Metía una callandra
Reclamu de los mozos
Que i pasien la quintana !
Muy blanca, si por ciertu,
Tá 'n monte la colada,
Y blanca ye la lleche
Y la ñeve perblanca;
Pero ¡ ay ! que Maruxina
Con lleche ' stá amasada,
Y de cuayá y de roses
Fixéroni la cara
A la roxina dolce
Qu' encandilóme l' alma
Al afurtame 'l fuelgu
Con una cigoñada.

III
Al monte empobinéme,
Al monte hala que hala
Por ver á Maruxina,
Por vella y galantialla,
Esguilapié 'l repechu
Y el pueblo acollumbraba
A d' u el mió dolce bixu
Queríu ñeru afayara;
En cántigues y fiestes
Rebulle la quintana
Como una pandereta
Que 'l lixeru tocara;
 Los cuetes asordaplen,
 La danza ' stá entamada
 Y del punteru esclúcase
 La música qu' encanta.
 ¡ Ay rala romería !
 ¡ Ay que corazonada !
 -Ascuche, muyerina,
  La de la saya parda,
  Vusté que vien d' arriba;
  ¿ Qué pasa en Rebollada ?
  Entrugué á una vieyuca,
  Que m' acutió á la cara:
  -Quiciaes non sépia ' I mozu
  Lo que perendi hábia ?….
  Que se casó la neña
  Más respinguera y maxa,
  Maruxa la de Pepa
  Con Pín el de Colasa,
  Un mozu pintureru
  Más guapu qu' una pascua,
  Que de servir al rey
  Fai pocu vieno á casa ....
  Pero ¿ por qué ¡ ay María !
  Más blancu qn' una sábana
  Se punxo magar dixi
  Lo que m' encamentaba ?
  Ay, vólviase el galán
  Ay, vólvia noramala
  Que si por ella entruga
  Afáyala casada;
  Mandá pa tres palacios
  Estevo la rapaza
  Y fo fiel al cortejo
  Que i pon las arracadas;
  Diz qu' al cayer soldau
  Trocó co la chavala
  Por una escarapela
  Un guyerín de plata
  Y que ' n una pavida
  Los hechizos i unviara;
  Pero ¿ quién fai apreciu
  De lo que el mundo fala ?

IV
Por ver á Maruxina
Fuí al monte hala que hala,
Allegre á la subida
Per triste á la baxada,
¡ Qu' ' l monte 'stá de lluto
Po 'l duelu de mió alma !
Les blanques malgarites
Amúsguense n' a grama
El pastorín non toca
Pa mín como tocaba,
Y puestu de mortayes
Semeya la colada.
¿ Por qué al pasar cabo illa
Solluta la fontana ?
¿ Por qué ' mpapiella triste
El paxarín nel alba
Qu´ ha pocu n' el carbayu
Felliz gorgolitiaba ?
¿ Por qué como endenantes
La pumará no ' scampa
Y d' árboles llorones
Antóxase semada ?
¿ Por qué la herba verde
Agora se desmaya ?
¿ Qué pasa á lo que vego
Que señaldá me causa !...
¡ Ay, foscos xarayales
Del negru Rebollada !
¡ Ay, triste camposantu
En' onde dexo l' alma !
¡ Ay, blanca Maruxina !
¡ Ay, Maruxina blanca !