Magg in Valada

From Wikisource
Jump to navigation Jump to search
Magg in Valada  (1929) 
by Umberto Pozzoli

Ubert Pozzoeu (1901-1929)‎

Magg in Valada

(1929)

Vegnii soeu ché visén a San Giuvann
- se voeuref inciuchéf de puesìa
a la matina prest, quand che i campann
i sùnen toeucc insemm l'Ave Maria.

El ciel, adess de magg, el büta nett
lüster e ciâr 'me i oeucc de la mia dòna;
el lâgh, gió abass, el possa toeutt quiètt,
celest, comè 'l vestii de la Madòna;

i tremen i fujett per el freschin
de l'aria che vee gió de la Valada;
i tasen ancamò toeut i füsin
e l'acqua intant la fa 'na ciciarada.

El dorma 'l Resegon dent in d'un vél,
e i munt de Valmadrera j en vìola
perchè la lüs del sû a travers al ciel
ja basa 'mè s'i foeuss una pupola.

De ché de lâgh i cimm de San Martin
i drizzen vers la lüs del sû un bell basin;
el munt a-Barr el pâr un bell bambocc

che varda cont un fa de trasugnent
stu gran basass del sû cunt i muntagn
e 'l fioeumm el se sturzìa, toeutt d'argent,
ai pè di bej culénn. In di campagn

soeui praa, soeui scês, soeui fiûr amò saraa
el brila la rusada in mila perli;
vìalter restef lé cumè incantaa
e pénsef che a durmé 'l saress de merli.

Ma sübit a scurlef d'un culpu sol
el ven de l'alt la vûs d'una campana
intant che sés lòdoj fan a vol
un cuncertin soeu 'n'aria de suprana:

la va, 'sta vûs, luntan luntan 'me 'n'unda
a salüdà 'l primm sû de la giurnada,
la spècia - din din dén - che ghe respunda
i so surell magiûr de la Valada.

Un gran silenzi in gir per un mument:
desmètten i sês lòdoj de cantà,
el pâr ch'i tremen pioeu i fujett al vent
e l'acqua la finéss de ciciarà.

L'è alura che se sent una canzon
che corr per el seree de la matina
da Lecch e da Laurca a Varigion
da Ciüs e da Belee a la Bunascina;

l'è alura che soeu ché a San Giuvann
el va gió in fund al coeur la puesia
sentend, adess de magg, i nost campann
ch'i suna toeucc insemm l'Ave Maria.