Mıriçık u Fitık

Beno nêbeno, mirîçikêk beno. Rojêk gilî şino lingerda ci. No vano ez se kera, se kera, se nêkera. Winîyeno ki di cinî hê nan pewjenê. Şino ê cinîyan het, vano "Ka kolîyê şima, şima çiçîya nan pewjenê?" Ê zî vanê "Kolîyê ma çin yê." Vano "Ê nê gilî mi lingi ra vejê, xwe rê biveşnê, şima nan bipewjê."

Cinî zî kêf kenê, kêf kenê, kêf kenê, vanê "Temam." Gilî vejenê nan pewjenê, nanê xwe qedînenê. No mirîçik pereno şino. Şino, beno poşman, pey di yeno. Vano "Ka gilîyê mi bidê! Ya şima gilîyê mi danê ya zî şima çaer nanî danê." Ê zî vanê "Eman hewar ma gilî veşna." Vano "Şima dê çaer nanî bidê." Nê werzenê çaer nanî danê, no perenno şino.

No şino şino, şino, finî vîneno ki şiwanên o yo şit şimenno, nan çin yo. Vano "Şiwanê, şiwanê. Ti yê se kenê, ka nanê to?" Şiwanê vano "Nanê mi çin yo." Vano "Hi to rê, nê nanî mi to rê ardê, ti xwe rê dek şitî miyan bişimi."

Şiwanê xwe rê kêf keno, kêf keno, kêf keno. Şiwanê nanê xwe keno şitî miyan, weno.

No şino geyreno, geyreno, geyreno, pey di yeno û şiwanî rê vano "Ya ti nanê mi danê ya ti çaer çarwey danê!" Şiwanê zî vano "Eman hewar, ez a çaer nanî kotî ra biyara to rê, mi nanê werdî." Mirîçik vano "Ez fem nêkena, ya ti nanan danê ya ti çaer çarwey danê!" Şiwanê werzeno çaer çarwey dano ci.

No çarweyan gîno pereno, fina geyreno, geyreno, geyreno. Finî weyneno ki cayên di veyveyê beno. Ê yê veyve kenê, şamî kenê hazir labelê goşt-moşt çin yo. No şino vano "Şima yê se kenê?" Vanê "Ma yê veyve kenê, çarwey çin yê, goşt çin yo ma biwerê." Mirîçik vano "Hin şima rê çarwey, nê niyê goşt xwe rê ci kerê, şamîya xwe virazê." Nê kêf kenê, kêf kenê, kêf kenê. Çarweyan gînê cikenê benê kenê şamî.

No şino geyreno, geyreno, geyreno. Fina yeno, wihêrê veyvî rê vano "Ya şima çarwayanê mi danê ya zî veyver danê!" Ê vanê "Eman hewar, ma veyver senî bidê to, ma çarwey zî werdî." Vano "Ez fem nêkena." Nê werzenê veyver danê nêy. No veyver gîno û geyreno.

Geyreno, geyreno, geyreno. Finî wîneno ki mêrdekê o yo fîtik ceneno. Şino ci het, vano "Ka na fîtika xwe bide mi, ez zî na veyver bida to." Mêrdek kêf keno, kêf keno, kêf keno. Na ya veyva haziri ameya mêrdekî rê.

Mêrdek gîno fîtik dano ci û veyver xwe rê gîno. No fîtik gîno û vicyeno şino darêr ser, vano:

"Duuut duuuut duuut…

Mi gilî da çaer nana,

Mi çaer nanî day çaer çarweya,

Mi çaer çarwey da veyverê,

Mi veyv zî da fîtikê,

Duuut duuuut duuut" vano, pereno şino.