Los sueños del probe Lín

by Carlos de la Concha y García Ciaño

Los sueños del probe Lín  (1925)  by Carlos de la Concha y García Ciaño

¡ Asturies del corazón !
¡ Solar y cuna d' España !
Con cuantu afán te contemplo
Desd' esta tierra lejana
Al través de un vasiquín
Desta sidrina de casa,
Desta sidre de mió tierra
Que sabe á rica manzana.
Véote querida Asturies
Humilde y acurrucada
Entre los Picos d' Uropa
Y el Puertu de Vegarada
Que te guarden y defienden
Como se guarda á una Infanta,
Princesa ó doncella hermosa
Po les bruxes encantada....
Y ye bono que te guarden
Porque yes muy codiciada:
Codicióte en otru tiempu
La República Romana
Y quixo facete suya,
Pero tú, fusti tan brava
Que non dexasti que naide
En tí posara so planta.
¡ Que lo diga el Sarracenu
Que según la Historia narra,
Con la ayuda de la Cruz
Y la Virgen Soberana,
E nos montes de Cuadonga
Quedó fechu una farrapa !
Allí fundó el gran Pelayo
La monarquía Asturiana
Y por eso Asturies ye
La cuna y solar de España...
Y que milagru que jueses
Por todos tan deseada,
Que ye to clima tan suave
Y de condición tan sana
Que nin apierta el calor,
Nin ye dura la invernada....
¡ Ay sidrina de mió tierra
Fecha con rica manzana !
Véote facer gorgoritos;
Y acuérdome de la gaita
Que 'n toes les romeríes
Y en toes les fiestes tocaba,
Angel Antón de Capita
( Fiyu de Melón de Juana ).
Dios en so gloria lu tenga
Po lo bien que la sonaba,
Saludando al Mayordomu
Tocando la alegre Diana,
Y en el coru de la Iglesia
Cuando la Misa de gala,
Hasta el mismu Cielu diba
La Marcha Rial que tocaba,
¡ Ay gaita la de mi pueblu,
¡ Ay de mi pueblu la gaita !
Que asemeyaba al xilgueru
Cuando canta na enramada,
Y al pinzón y al veranín,
Y al pardillu y la calandria;
Y acuérdome sobre todo,
Del cantar de la rapaza
En eses tardes d' otoñu
En que llendando la vaca,
Entona el «Señor San Pedro
Y la «Virgen Soberana»
Y «Hay un galán nesta Villa
Que ye nuestra antigua « danza »...
Y enrédense los recuerdos
Como se enrieda la llana
Del « cadexu » que mió güela
Puestu na rueca filaba,
Y recuerdo los cantares
Que de pequeñu cantaba,
« La caso del señor Cura
El Trébol y la Praviana »
« Tengo de subir al puertu »
« Canta com' una xiblata ». .
Y canciones de pastores
Pe los montes y la braña
Y recuerdo versos vieyos
Que de neñu recitaba.
¡ Ay bable, lengua materna !
¿ Por qué fusti abandonada. ?..
Gracies á tí sidriquina -
De mi tierra tan preciada
Estoy soñando despiertu
Co la tierrina Asturiana
Y recuerdo les esvilles,
Y el maguestu y la filada,
Y les noches de cortejo,
Y acuérdeme de mi casa
Que me paecía tan grande,
Y ye com' una cabaña
Y acuérdome de la iglesia
Donde mi madre rezaba,
De la escuela, del maestro,
Del señor Cura, del ama,
Del campu donde corría,
Del sitiu donde jugaba,
Al pido campu y al marro,
Al chole y á la pampaina.,.
Y con toos estos recuerdos
Sidriquina de mi alma
Quier salir un i xuxú
Desde el fondo de la entraña
Y al pasar por el gargüeru
Se m' ataruga y atasca
Y non sé si ye sollozu
O si ye una carcajada,
Pero sé que de los güeyos
Quier brotar dalguna llágrima
Y sé que con tu color,
Y sé que con tu fragancia,
¡ Sidriquina de mió tierra
Fecha de rica manzana !
¡ Para mi siempre serás
La encarnación de mi Patria !