Lluna, llunera

by Luis Martinez de la Vega

Alluma la lluna...
Nin xime 'l carbayu;
Nin canta 'l mochuelu
So cantar tristayu.
Les xanes na fonte
Seliquina y clara,
En rayos de lluna
Non bañen la cara.
¡ Tou durm' en silenciu !
Non hay caseríu
Con perru medrosu
Que llanci' un Iladríu,
Nin mozu ronderu
Que lloñe ó cercanu
Y-cante á la lluna
Un son asturianu.
¡ Tou durme; tou xulia !
Sólu y pesarosu
M' alcuentro dispiertu
Nel mont' en reposu.
M' alcuentro dispiertu
Mirando isa Iluna
Q' allumó utres noches
Mió amor en fortuna...
¡ 0h, lluna llunera !
¿ Quién nos cuntaría
Q' el tiempu dichosu,
Sin ainar, s' iría ?
¡ Y fuxó aquel tiempu !..
Ya la moz' aquela
Q' ayeri me quixo
Por mín non fai vela;
Ya non sal' á veme
A la so ventana
Aquela riidora
Carina de xana,
Q' encantáu dexóme
Un día que la viera
Cruciar, felechando,
Pe la carbayera.
¡ Oh, llunera lluna !
Quiciáes olvidasti
Les noches aqueles
En que m' allumbrasti...
Les noches aqueles
Que, tochu, 'n senderos
Golvía yo, por vela,
Los argayaderos.
Baxaba del monte
Contentu y ufanu;
Baxaba del monte
Suañando col llanu.
Col llan' u s' afaya
L` aldea de Melgores,
Dond' aquela moza
Púnxom' en amores.
Rapaza melguera;
Rapaza xentil;
Rapaza col rostru
De rosa d' Abril;
Semblante de pascua;
Voz de xiblatina;
Güeyinos de llumbre;
Alma de santina;
Risa q' asemeya
Un chíu celestial;
Dientinos de perles;
Llabios de coral;
Pelu d'azabache;
Cuellu de xazmín...
¡ Qué lluego, mió neña,
T' olvidas de mín !
Lloñe,lloñe vivo,
Rapaza querida;
Lloñe del to pueblu
Pásase mió vida,
Mió vida, ñerada
De penes y xera
Desque non t' atopo
Pe la carbayera;
Desque los tos güeyos
Non miran los míos;
Desqu' utros amores
Los tienen sorbíos;
Desque non me quieres;
Desqu' atristayáu
Vivo perdoliosu
De vem' olvidáu;
Desqu' á to ventana
Non llogré amirate,
Dempués que les noches
Perdí' en esperate;
Desque sabe mi alma
Que son, llenguatera,
Los tu xuramentos,
Pómpara lixera
Q' el soplíu más sele
Desfai nun momentu;
¡ Que son tos palabres
De vientu y pal vientu !...
Y tú, lluna, lluna,
Q' esplandías lluciente
Y faes q' el recuerdu
D' isti amor murriente,
Reñazca dañible:
Con un rayín d' oro
D' esos que nos únvias,
Díi cuantu l' adoro.
Díi que nin l' olvido,
Nin faigo 'l intentu;
Qu' ella m' atormenta
Y q' amo 'l tormentu.
Díi cuantu la quiero;
Díi, lluna llunera,
Que la quedré siempre
Aunque non me quiera.
Díi que non descanso,
Si la to lluz baña
Com´ en esta noche
Mió probe cabaña.
Que suaño dispiertu
Viendo tos fulgores
Q´ella y yo amiramos
Xuntos en Melgores.
Díi que xuro ´n mi´alma
Non falai siquiera....
Peru....que s´asome
Pe la carbayera !....
Que solu amirando-i
Su rostru risueñu,
Senrá l´pesar míu
Munchu más pequeñu.
Díi que á Dios i-pido,
¡ oh , lluna, llunera !
Golver á atopála
Pe la carbayera,
Aunque non m´amire;
Q´aunque non me quiera,
¡ Yo quedréla siempre,
Oh, lluna, llunera !