lipu kule/isipin

←lawa pi ma Setona

lipu kule  (2021)  isipin by kala pona Tonyu

nasin kulupu li seme?→

tan lipu lipukule.org/post/2021/02/22/isipin

tenpo ale la, jan mute li pali e nimi sin pi toki pona. jan mute li toki e ni: ‘a, mi wile toki e ijo ni lon toki pona! taso mi sona ala e nimi pona tawa ona. ni la mi o pali e nimi sin pi kon ni. a a.’ tenpo mute la, nimi sin li musi taso, li kama suli ala. jan mute li sona ala e ona.

taso nimi sin wan li ante: isipin.

pali ona li tan musi ala; jan Ko li pali suli tawa kama lon pi nimi ‘isipin’. ona li alasa e nimi pi toki mute: e nimi ‘kele’ tan toki Epanja, e nimi ‘omo’ tan toki Nijon, e nimi ante mute tan toki ante, sama ‘oja’, ‘amin’, ‘mana’, ‘weluwa’, ‘ipike’.

nimi ‘isipin’ kin li lon ni, li tan toki Pilipina.

jan mute li lukin e nimi alasa mute, li pilin e ni: nimi ‘isipin’ li pona mute tawa kalama pi toki pona. ni la, nimi ‘isipin’ li kama lon.

taso kon pi nimi ‘isipin’ li seme? kon ona li sama sona, sama pilin, sama sitelen, sama lawa, sama alasa sona, sama toki, sama nanpa… sama nimi mute. nimi ‘isipin’ li lon ala la, jan li kepeken toki ante tawa kon ona. jan Sonja li toki e ‘toki insa’. jan mute li toki e ‘pilin’. taso kon pi nimi ‘isipin’ li kon ale pi nimi ni.

jan Ko li pana e kon pi nimi ni tawa jan ale. jan mute li kama kepeken ona! jan kepeken la, pona pi nimi ‘isipin’ li ni:

• ona li LILI! sina wile toki e nasin isipin kepeken ala pi nimi ‘isipin’ la, sina wile kepeken nimi mute. taso, sina toki e nimi ‘isipin’ la, nimi wan taso li lon!
• kon pi nimi ‘isipin’ li mute. ni li pona tawa jan ale - ‘isipin’ ala la, nasin isipin pi jan wan li ‘pilin’. nasin pi jan ante li ‘sitelen insa’. nasin pi jan ante li ‘toki insa’. ni la, jan li wile toki e nasin wan tawa isipin la, ona li ken ala alasa e nimi pi pona ̨tawa jan ale. taso ‘isipin’ li jo e kon ale - kon pi nimi ‘isipin’ li nasin isipin pi jan ale.

ni la, jan mute li kepeken nimi ‘isipin’ a! taso awen la, nimi ‘isipin’ li ike tawa jan ante tan ni:

• kalama pi nimi ‘isipin’ en lukin pi nimi ‘isipin’ li nasa lili tawa nimi ante pi toki pona…
• nasin pi nimi ‘isipin’ li lanpan tan toki Inli. nasin isipin li ijo mute, li ijo wan taso ala. ni la, o kulupu ala e kon mute tawa nimi wan!
• ‘isipin’ li nimi pi pu ala. jan mute la, ni li suli: nimi pi kon ‘isipin’ li lon ala pu. ni li nasin pi toki pona - jan li ante e ona la, ni li ante li nasa tawa nasin pi toki pona.

ni la, jan kepeken li awen toki e pona pi nimi ‘isipin’. jan pi kepeken ala li awen toki e ike pi nimi ‘isipin’. lon tenpo open pi nimi ‘isipin’ la, jan mute li toki mute e pona ona e ike ona! tenpo ale la, jan li kepeken ‘isipin’ lon toki ona la, toki suli pi utala lili li kama lon.

taso tenpo ni la, pilin pi jan mute tawa nimi ‘isipin’ li kama wawa mute ala. jan li awen pilin ike tawa nimi ‘isipin’. jan ante li awen pilin pona tawa nimi ‘isipin’. taso sama ala pi tenpo pini la, utala li kama lon ala tan nimi ‘isipin’.

taso, jan pi kepeken ala li awen pilin ike lili, li awen musi e jan kepeken. sina kepeken ‘isipin’ la, jan ante li musi mute e sina - ‘a a, sina kepeken nimi ‘isipin’!’

taso tenpo mute la, ale li pona. nimi ‘isipin’ li nimi pi kon pona. sina wile pana e nimi ‘isipin’ lon nasin toki sina la, o pali e ni!

(taso, pilin mi la, nimi ‘isipin’ li musi taso, li pona ala tawa toki ale, a a!)

tan lipu

nimi ale, kule epiku Atawan, https://drive.google.com/drive/folders/1odOeRhe7-I2g25OmeyazW5uAD56m5Po7 lon tenpo suno 31 pi tenpo mun wan pi tenpo sike 2020