Lingua materna

by Gudench Barblan

Lingua materna

Chara lingua da la mamma,
Tü sonor rumantsch ladin,
Tü favella dutscha, lamma,
O co t'am eu sainza fin!
5In teis suns, cur eir'in chüna
M'ha la mamma charezzà,
E chanzuns da l'Engiadina
In l'uraglia m'ha chantà.

M'hast muossà cun vair'algrezcha
10Mia patria ad amar,
Seis eroes, sa bellezza,
In chanzuns a dechantar.
Da l'amur la dutscha brama
Hast express tü e guidà,
15Hast nudri la soncha flamma
Chi'm rendaiv'uschè beà.

Sco il chant da filomela
Am parettast tü sunar,
Cur alur'in ma favella
20Meis infants sentit tschantschar.
Millieras algordanzas
Svagl in mai teis pled sonor,
Svaglia saimper veglias spranzas
Chi ün di han moss meis cour.