Liko Jetje päkidof (prim)

(Koned nedänik fa Justus van Maurik jⁿ. Lovepolam volapüki se pük nedänik fa F. v. Aerschot).

Pesezügöl se vobuk nulik « Volapük as vödal literatik » fa Läd ledivik Ida Glogau (Pokrütom). Ut kel desidom nolön fovami kona selolös buki cogik e nitedik at, len jilautel in Schockau lä Böhm. Leipa (Bömän). N. R.

Binos plo spiratedel stimalöföl, kel binom boso poganebelik, viudan e nefagilogik, e labom jäfi nestilik, vo neläb, ven labedom jisoni jönik, jikel yofik e smilaklienik, no kanof sludön aiblibön leglifölo vio jinepematan bäledik, po lumufabifoinils vealastofik linedacöma lügik, sod kinof üpo lupükotön ko ailemel sembal, u, stanöl in yan, logön ali sol gälik e beigolans.

Dalolös obe konön en bosi, pöfüdü e tidamü spiratedels tugik valik, yunans nepudik e jipuls löfik valik.

---

Su « Nieuwendijk »^[1] älödom sis yels Bommers semik kel älabom lemacemi spiras nemolädik, e du yels bal pos votik, ästanom ko gunil piniko nidöl lüstrik^[2] e ko smahätil leigik su kap, po jonatab, al devätön nebü dünel lemacema, kel äsenedom leigo bälebakik e klebik äs om it, kafi, smarosinis, juegi e svidotis votik u selön talaleüli, sirupi e läfaleüli.

Bommers noe äbinom spiratedel, soi fat, efe una Jetje, jikel, pasevöl in nilanöp as « Jetje jönik », kodü logod lolik, logs yulibik, smilöl e hels katukablonik ofa. Pänemof, plu pato fa yunans lödöl nilo « smilamudil » bi älabof mudili ledik so flenik, kel kobü sebils lelöfikün tel in cigs zadik ofa, äismilom so löfliko e lesumiko, üf ailemel sembal generis masculini^[3] äcogom boso ke of, ven ästanof fädiko in lemacem fata ud äjuitof luti flifik su sutlidöp bifü dom.

Sumü figs, sükat, rosins e daifots votik Bommers äselom i zigadis, kels, ifi äsenedoms pöligiko glüno-yelibik e pespeköl, süpito pälöfoms e päsükoms vemo, sovemo sägo, das Jan, dünel lemacema ästunom dö atos ed äkinom sagön lusmülölo masele oka: « Klödob das stars et » - benemam palöföl fa Jan plo « spes patriae »^[4] - « laboms dili skita in mud pla lineg, ibo, if cedoms « bokkies »^[5] et daifik...»

Jan äletom seti nepafinöl ed äbinos ba i läbik. As gepük lebalik cif äsmülom nestümölo, äfovom nämo tedi zigadas ed älonom foviko suämi elas « bokkies » pla mäl plo « dubbelte »^[6] fol plo « dubbelte .» « Sötol te sagön, das exänoms tefü suäm, lilö Jan! Sumoms omis deno » äsagom semdelo. - Jan ämurom oko: « Smökönö smekik! » ed ätikom läs: « Ven Jetje binof in lemacem, kanob selön omis leigo gudiko a « cents. kil. ». No äbinom Jan netikavik!

Se Nunal nulik 1891, Nüm: 6, Pad: 27.

1. Ledam nulik, süt in Amsterdam.
2. Lüstre binom stof blägik, nidöl.
3. gena manik.
4. spel fatäna.
5. luzigads.
6. dubbeltje binom könab nedänik. Bemalom ofenüno suämi zigadas somo in Nedän.