Lifanunods tidelas volapüka. Wolter Henriette
Pemotob 1821, balsul 8. in Harburg len Elbe. Nem oba bü mat ebinom: Wedekind. Nu vilob penön tideles e jitideles löfik e pastimöl nunodi oba.
Dutobsöd bepenön plakis obas tefü dins vpa! Peneds obas oplesefoms jeni püka ät, kel pedatuvom fa söl lepetidöl: Johann Martin Schleyer. Bepenobsöd zidis valik, al stimön mani at, kele danobs gälis vemo mödik sukü datuvam gletik oma! Söl Schhleyer lebalik ebinom tidel genialik oba! Elabob ni vödabuki, ni glamati. Pianiko vöds anik püka nulik pebükoms in mulabled oma: »Sionahap«. Epenob tiemo len söli Schleyer lafo in volapük, lafo in pük deutik. Söl Schleyer egepükom egelo obe, egelo jaföl vödis nulik ed egelo ebinom tidöl sufädiko obi me spodakads ed i me bled oma: »Sionahap«. At ebinom begin studa obik püka nulik e smavelatiko i plo votiks valik, kels tiemo esevoms bledi at. Atos ebinos in yel 1879. In yel suköl glamat balid epubom. Buk at äblinom i vödabuki balid. — Gäl ebinom gletik! Spods pedugikumoms ed espodob ko vomül Wirsching Angelika, ed obs bofik eblüfobs dagetön flenis nulik plo din gudik volapüka. In yel 1881 epubom yelüp balid volapükableda. Söl datuvel volapüka edanemom in muls balid balidis tidelis püka nulik. Elilädobs tiemo nemis suköl: Lenze, Bauer (Bánfi), Wirsching, Emmert, Peitz, Ölschig, Loos. In zülul yela at: Domicke, Jakobs, Wolter, Bräunig, Schultes ed in balsebalul dokel Obhlidal pedanemoms.
In yel 1882, efe in jölul e zülul söl dokel Obhlidal pedanemom as cif balid volapüka plo Löstän; fälo pedanemoms as cifs plo Württemberg söl Kniele Ruppert e plo Nolüdeut ob it. Stük at, Nolüdeut, no ebinom so gletik äs vöno isibinom Nolüdeuta fedatat. Ebinob pesevik in Schleswig, Holstein, Lübeck, Hamburg, Bremen, in Braunschweig, Oldenburg, Hannover e len Harz. Stüks iet binoms fikulik al dilön. Nem et: Nolüdeut ebinom säto kapälnik plo tim balid volapüka, ibo ebinob tiemo jitidel lebalik in stük lölik. — Sosus söl datuvel volapüka edanemom obi as jicifi plo Nolüdeut edutävob stüki oba ed evisitob in Harburg, Hamburg e l. lädis ed i sölis, kels tiemo ebonedoms bledis volapükik. Sis täv at obik num tidelas in stük oba pemödom. Oms it obepenoms nunodis omsik, abu ob finob nunodi oba ko vip: Söl datuvel volapüka lifö! e volapük löfik obas lifö! e glofö!
Se Mulapenäd nebolitik: Volapükagased 1888, Nüm: 3, Pads: 17.