Lifanunods tidelas volapüka. Van Aken F. C.
Pemotob in Princenhage (Prinsenhaqe) 1854, balul 16. Egolob in jul isik jü lifayel 12.; estudob poso in Breda, in jul balid komotik. In lifayel 14, pexamob as steifal tidelacala. Xam et egivom tiemo giti, tidön julanis yunik ed al getön glato tidi in kinänastid patik (tidavajul). Laböl lifayelis 18 pexamob as tidel gletava, mafava ed as yufatidel. Ecalob as somik in jul sembal paga obsik du yel bal e poso in jul de Breda. In yels kil elenadob pükis flentik, deutik e nelijik ed emekob tataxamis in plisips pükas et. Egebob fovo yelis tel al dagetön dipedi löpatidela. In lifayel 25, pevälob as cif jula komotik in Ravenstein, kö nu calob du yels 10. Tidob togo in balüdel alik in tidavajul in Grave (Hrafe), zif seistöl len Maas, hols tel löpo Ravenstein. Flen obik e calablod len stid at ebinom volapükatidel telid in Nedän. Elilob balüdo pükön omi dö vp. Evedob nulälik ed elugivom obe glamati e vödabuki, kelis estudob du dels kil in vakanüp lemotöfazälik. Epenob poso penedis anik söle Schleyer, kel epotom foviko dipedi tidela obe. Dinäds difik eneletoms suno studi obik vpa. Ab krüt negönik in zilak sembal flenas ekodedom obi penön potakadis ali läns difik, in kels vp. pipakom bevüno, al blöfön plobi püka at flenes obik. Atos eplöpos lefulniko obe danü volapükans mödik, kels egepükoms vilöfiko. Zu ob it evedob denü plägel zilik sis spod oba, keli fovob bizugiko ko pösods, kelas pükis no sevob. Löfob vpi e vilob yüfön steifis al pakön dunliküno medi sikik at melaka.
Se Mulapenäd nebolitik: Volapükagased 1889, Nüm: 4, Pads: 22.