Lifanunods tidelas volapüka. Schmidjörg Josef
Pemotob in yel 1850, kilul balid, in domil smalik, labed pülik paelas obik. Domil at stanom len Danub susü leflum hol lafik fagü Linz, glezif läna Löpalöstän. Top panemom »San Margarethen« e binom dil de Linz. Ifi plad in löd ebinom smalik, deno leflum, gad, fot e meids nilik, kels zümoms domili, egevoms spadi sätik obe e pledasogeles obik no te in hitatim, ab i in nifatim. Efedlimob iso cilüpi so läbik, das deil tusunik fata obik (elabob te lifayelis 6) nena emekom geblibön mebi kleilik in lan oba. Evisitob yels mäl glejuli pädik in Linz, kladis fol gümnada tatik e enütlidob, laböl lifayelis 17 in tidelaseminöp. Pos yels fol etevob mofo, al plägön cali subimik tidela. Edagetob cäli as disatidel in pag Feldkirchen, fagü lom obik te hols fol. Ebinob läbik emosumön sukü cälam obik dili kudas mote obik, kel ekomipof egelo ta nelab. Ab log obik, pekösömöl logön vadelo beiflumön leflumi gletik Danub, enelabom vemo lenlogedi at, e ifi etevob ofeno al at, pegezugob valüdiko al at e al lom obik. Pos foldils kil yela elovesumob cäli leigik in fatazif obik. Eseivob iso nedis, kels no epötoms lemesede obik. Emekob sikodo xami, kel ebinom zesüdik al getön cäli gudikum. Ye vanliko! Esäkob migälodiko julakonsälefi läna demü kod denesiama obik. Egepükon obe, das binob nogo tu yunik e das labob yelis calik tu nemödik. Esludob setevön, lädyulön fatazifi obik e sükön läbi obik in Bälöstän nilik. Elovesumob cäli as tidel in Breitensee nilü yans vesüdik de Wien in kilul yela 1874. Eplägob iso cäli yels tel e lafik. Egebob delis livüpa al tevön al glezif nogo löliko nepesevik obe, u da zümöp magifik de Wien. Stid ebinom tiemo in Wien peciföl bizugiko fa dokel Dittes, kel binom pesevik as man mäkabik bevü dadukavels in vol lölik. Stid at panemom: »Wiener Lehrer-Pädagogium« (Stid dadukik plo tidels de Wien). In stit at tidels ekanoms lefulön sevis okik. Esenob vipi vemo gletik visitön stidi at; ab de calöp obik töb ebinom tu gletik. Estaifob cäli in Wien e at pegevom obe in stük balsid, kö stebob nogo egelo. Evisitob täno du yels kil stidi penemöl. In yel 1880 evedob malädik sukü hitip luega e ti ilaboböv fäti ot, äs volapükaflen Ivan Cholin, edeilöl tu suno. Fagü Wien in lapalän jönik Löpalöstäna esaunob pos muls anik. In yel suköl ematob e elifob plo cal e plo famül obik. In del sembal beginü balsul yela 1884, flen obik, nu ya edeilöl, ejonom obe notedi in gased de Wien, dubü kel söl dokel Obhlidal M. enotom begini tidama volapükik in gümnad de Meidling. Flen e ob elilobs jü nu nosi dö volapük, do vpaklub ya esibinom sis yels tel in Meidling, fagü obs hol bal. Ebömetobs balvoto visitön tidüpi at, do elabobs mikonfidi ta din at. Pükats söla Obhlidal ebinoms so venudik e nitedik, das tep, lömib e nif no edejekoms obis golön vegi al us. Ya in düps anik egetob suadi, das säk püka valemik pilivom medü vp. Estudob sikodo ziliküno vpi, ibo vp. estadom tiemo nogo vemo badiko in Wien e dokel Obhlidal enedom yüfami, kevobeli luüno betikälik e at ob evedob.
In yel 1885, velul 15., egetob dipedi as tidel vpa fa söl Schleyer J. M. e in flukatim yela ot ebeginob tidön volapüki. Eplakob suno otosi, kelosi volapükans balid iplakoms ti valöpo. Ab smil e kof no edejekoms obi, sod estigoms obi vobön ziliküno plo vp.; ibo cil smalik nedom yufi. In yel 1887, mälul 2., egetob dipedi as löpatidel (nüm 50) e in yel 1888, balsebalul 15., egetob sukü vobäd dipedi as plofed vpa fa vpaklub flentänik in Paris. Vilob seilön dö pükats e tidams obik gönü vp., ibo ats pebepenoms in gaseds de Schleyer e Obhlidal. Edunob ko löf gletik plo din at nemödikosi, kelosi ekanob dunön plo pakam vpa medü näms pülik e oblibob egelo züpel fiedik döla at beläböl menis. God sefomös, God jelomös volapüki e mödomös züpelis ota!
Se Mulapenäd nebolitik: Volapükagased 1889, Nüm: 11, Pads: 53.