Lifanunods tidelas volapüka. Gehrmeyer Aug. Friedr
Pemotob 1858, lulul telsejölid in pag Oesede (Ösede) lä Osnabrück. In yels 1874 jü 1877 ävisitob tidelaseminadi bijopik in Osnabrück. Dü julayel 1877/78 ägovob kladi folid len pulajul päda Sn. Johannes Bapt. in zif ot. Pos lesustanazäl 1878 päfepladob de Osnabrück ali Neumünster in Holstein. Usit äblibob jü 1886 as tidel popajula bakladik lesedakomota.
1883 äsumob dismüti lonedikum demü katar luega e gugapa. Tiemo ätuvob in »julagased katolik« de Donauwörth laltügi dö volapük, kel ästigom obi ali studam püka nulik at. Begin studama vpa äjenom in laf telid velula 1883. Äpenob penedi balid söle datuval ledinitik 1883, balsul 21. Diped tidela vpa ko dät 1884, jölul 17. änakömom in Neumünster len del 19. ota mula.
Vobils oba plo pakam vpa in Holstein äbinoms te: Sedilam penädas volapükik, e penam laltügas lesmalik dö datuv at. Vobs at liedo no älaboms seki sembal plo pakam vpa. 1886, balsul 11. päfepladob ali Ankum leni sifajul geilikum as tidel pöplepalölas plo seminad. Id is epenob laltügi smalik dö volapük ed epükob en ko flens e pesevels; kelos jünu eblinos vpajulanis mäl: sanelis, tidelis e tedelis a tel. Spelo ogetobs in stük isik pianiko nog julanis mödikum. Volapük melidom vö pakami legletik e söl datuval legäli geilik dub atos.
Se Mulapenäd nebolitik: Volapükagased 1888, Nüm: 10, Pads: 59.