Libre de Memorias/1386

← 1385

1386 Libre de Memorias

1387 →

L'an MCCCLXXXVI foron Cossols,

• Senhor Johan Coyra, per Mesies, Borzes et Avocats.
• Senhor Johan de Pradas, per Mercadies, Notaris et Canabassies.
• Senhor Guilhem Nicholau, parayre, per Parayrie, Mazel et Aludarie.
• Sanhor P. Fons, per Sabaties, Coyraties, Fabres, Monies et Peyralies.
• Senhor Ramon Roqua, per Lahor, Fusties et Borgies.

Foron Clavaris.

• Senhor Johan Orthola, per Mesies.
• Senhor Estaci Dura, per Parayres.
• Senhor Ramon Marti, per Lahor.

E feron de talha aquel an per testa, cascun dimergue, una blancha.

Pus feron un denier per lbr.

Pus feron de talha per testa, VIII gros et VIII patz.

Pus feron per lbr. un patz.

Foron levayres de Bans.

• Johan Gayschat, per Mercadies.
• Bernat Miralhie, per Sabaties.

Foron Carrayries.

• Johan Betinha, per Mesies.
• Ramon Emengau, per Mercadies.
• Esteve Gaucelm, per Pararie.

Foron Caritadies.

• Johan Avesque, per Mesies.
• Peyre Trencavelh, per Mercadies.
• Johan Barrieyra, per Sabaties.
• Peyre Brenguie, per Lahor.

Lan sobre dich a XVII decembre, venc a Bezes lenquisidor de Carcassona, e fec aiornar los senhors Cossols que venguesson davant el; et los ditz senhors Cossols aneron lay am mesie Ramon Fabre e mesie Jame Bru avocat, et am motz dautres bos homes de la viela; e fes lur fan sagramen de lenquisicio. Pres ne carta maystre P. Estaci, notari rial.

Aquel an sobredig, MCCCLXXXVI a XXIII de dezembre, fes molt gran neu, que ne caret tanta, que totz los olivies trenquava e arahava per lo gran pes que avie.

Aquel an mezeis, lo premier jorn de genoyer, qui fouc a dilus, ad hora de tiercia, fouc eclipsi, que semblet que lo jorn fos tornat nuech negra: don motas gens de pahor sen fugiron a la glieysa.

En aquel mezeis an MCCCLXXXVI, a XIII del mes de juli, pres molher nostre senhor lo Rey de Fransa mossen Karles, jove, que era de letat de XVIII ans; soes a saber, la filha del duc de Bavaria dAlamanha; et non jac amb ela mais tres nueg, que venguero li novelas que la viela de Dam sera facha engleza, laqual viela es en Flandres, per laqual causa lo Rey vay far fa motz grans provisios, soes, de II cens melia saumadas de besquech, e III cens navs cargadas de fustas e de castels, per trametre en Englaterra am lo conestable mossen Olivie de Clisson, lasquals provisios feron totas cremadas per los Engles et per las gens de Gans.

El Rey de Fransa auzen las nouelas dessus dichas tantot, montet en armas et anet sen en Flandes, et vay metre lo seti davant la viela de Dam, e tenc hi lo seti XXXV jorns, et apres va penre per fach darmas la dicha viela en que avie dedins M e V cens bassinets d'Engles e de Gans, e fes los totz mori, e metre a lespaza, exeptat los Engles dEnglaterra que no volc que morisson, et en apres fes ardre tota la viela.

Lan dessus dig, a XXV doctobre, vengro lettras de part la Regina de Fransa, que fouc filha del duc de Bavaria en Alamanha, quez ela sera ajaguda dun bel filh, loqual avie bateiat lo comte Marti, et avie li mes nom Karles: Dieus del cel lo nos salve.

Et abudas aquestas lettras, los senhors Cossols sobre digz van ordenar que hom ne fezes grand processios, e van mandar totas las escalas dels mesties; que cascun vengues am lur banieyra, a la Mayo comuna, e van ho fa; e daqui partiro, e sen anera a la glieya catedral de mossenhor Sant Nazari, en la manieira que se sec,

Premieiramen foron mandats totz los religios, et totas las autras glieyas de Bezes, que venguesso a la glieya de mossenhor Sant Nazari, per far preguieyras a Jehu Crist, que li dones bona vita e longa.

Item partet tota premieyra a caval de la mayo comuna tota sola, la banieyra del Rey;

Pus apres anet la banieyra de la Mayo comuna, tota sola a caval;

Item anet apres, la banieyra de Taulas, am la banieyra de Mercadies, essemps tot a pe;

Pus la banieyra de Pararie, ambaquela de Mazel, esemps tot a pe;

Pus la banieyra de Notaris, ambaquela de Messies;

Pus la banieyra de Sabaties, ambaquela del borc de Sant Afrodisi;

Pus la banieyra de Canabassies, ambaquela del borc de Sant Johan;

Pus la banieyra de Coyraties, ambaquela del borc de Sant Jacme;

Pus la banieyra de Fusties, ambaquela de Pelicies;

Pus la banieyra de Fabres, ambaquela del borc del Rey;

Pus la banieyra de dOrgies, ambaquela del borc de Montibel;

Pus la banieyra de Camp nou, ambaquela de Peyralies;

Pus la banieyra de Sastres, ambaquela de Peysonies;

Pus la banieyra de Molinies, ambaquela de Candelies;

Pus la banieyra de Teysseyres, ambaquela de Tenheyres;

Pus la banieyra de Cardayres, ambaquela de Messatges;

(ca) Aquí hi ha un full transposat dins el manuscrit.
(en) Transposed page inside the manuscript.
(es) Aquí hay una hoja transpuesta dentro del manuscrito.

et apres totas las banieyras, aneron los senhors Cossols am tot lo poble de la viela de Bezes, et partiro de la Mayo comuna en la maniera dessus dicha, et aneron totz a la glieya catedral de mossenhor Sant Nazari; e van yssir totas las processios e porteron davan las processios la banieyra del capitol de Sant Nazari, e daqui partiron las banieyras de dos en dos, aneron per la viela, et vengueron totz al sementeri de Santa Madaelena, e aqui se fec mot gran solemnitat e hi feron gran sermo que presiquet un frayre Meno, maystre en santa theologia.