Libre de Memorias/1247
| ← Index | 1247 Libre de Memorias |
1336 → |
L'an MCCXLVII, el seten jour del mes d'abriel, Trencavelh viscomte de Bezes, fes carta e instrumen dabsolucio, als senhors Cossols de Bezes, del sagrament de fizelitat que los ditz senhors Cossols e la viela de Bezes li farian e eran tengutz de far, e yschamen del servisi e servitut que los sieutadas de la dicha viela li farian: Esta ne carta publica, laqual es en la gran cayscha de la Mayo comuna.
Item lan dessus dig MCCXLVII e la novena calenda de jun, se comenset lo tractamen de far lo comensamen de la font del mercat de Bezes, per los honorables senhors Cossols, e per tot lur honorable cosselh de la dicha viela de Bezes, en la manieira que podes vezes hobrada.
So son los senhors Cossols sobreditz, que en aquel temps eron; soes a saber:
Senhor Bernat de Pradas - senhor Peyre Pantasalada - senhor Esteve de Bajas - senor Peyre de Santa Aularie - senhor Guillem Daynha - senhor Bertran Sayschac - senhor Peyre Moliniez.
Lorsquals senhors Cossols dessus nominats van apelar los sehors desus escrigx e motas gens de la viela de Bezes per saber si degun y volia deguna causa dir.
Premieirament van appelar los sobreditz senhors Cossols, mossen Johan Cranha senescalt de Carcassona e de Bezes. Pus van appelar mossen Ramon evesque de Bezes. Pus van appelar mossen Guilhem abat de mossenhor Sant Jacme.
Pus, mossen Jacme abat de mossenhor Sant Afrodisi.
Pus, van far venir lo senhor Bernat Cans, el senhor Guilhem Guitart, los quals dos senhors van prepenre l'obra de la dicha fon, aissi quant vezer se pot hobrada.