Lejül hätela
Hätel in Nolümelop imeditom ya lonedo dö lejül pötöfik e ninpenäd plo lemacem omik. Fino idatikom bosi kel äplidos ome, ab äsludom bisiadön büo pälübi medita omik lecede flenas anik. Ninpenäd plo lejül äbinom:
mekom e selom hätis
e löpo imagom häti. Flen balid, keli ävisitom, äsagom:
- Binos vemo gudik, ab vöd hätel binom nezesüdik.
- Li-tikol atosi?
- Lezelado, cödatolöd ol it: hätel mekom hätis! Li-okömon ba lemön hätis lä pötekel?
- Vo, nepölol, omosumob vödi. E ko yeg pemenodöl golom al visitön fleni telid. At älilädom:[1]
mekom e selom hätis
- Li-binol fopik?
- Kikod? säkom Thompson.
- Bi penol: plo mon kädik. Nofol bonedelis olik, if niludol, das viloms lemön hätis olik klödato. E ludas vilol klödatön sotimo, täno vöds at änedalomsöv ole atosi.
- Nepölol, vöds at mütoms depubön.
E ko yeg denu pemenodöl visitom fleni kilid.
mekom e selom hätis
at äliladom.
- Ab no li-tikol, das binos vemo lindifik ute kel lemom häti in lemacem olik, kim emekom omi?
- Kisi vilol sagön dub atos?
- Benö, das vöds mekom e binoms nezesüdik.
- Vo, vöds at kanoms pamosumön.
Nu yeg obinom zelado neblamik, Thompson äsagom oke, ab deno deno ävilom bekonsälön nog fleni folid.
selom hätis
at äliladom. Selom! ädenuom: selom!
- Li-tikol ba, das ek obinom so fopik niludön, das legivol hätis?
- Binos velatik, Thompson ägesagom, omenodob yegi.
E ägolom al flen lulid.
Häts
at äliladom.
- Kisi nesiäm at malom? Emagol häti löpo, mosumolöd sikod vödi häts, täno binos gudik.
E Thompson ämosumom vödi häts, ab nu ägolom foviko domo, ibo, ätikom, if atos mogolos somo, flen mälid osuädom obi mosumön binemi obik e flen velid sägo Thompson. E so ädunom pänön su lejül häti e pladön nemi okik diso.
Middelburg (Nedän)
NOETS.$ (Vükifon)
- ↑ Jiniko bükapök; pla: äliladom.
Se Volapükabled Tälik 1888, Nüm: 7, Pad: 53.