Le Cumley Maceray

by Hecî Qadirê Koyî

Le cumley maceray dûrî wîlayet
Emeş basêk e xoş e wek hîkayet

şewê danîştibûm bê şem’ û mîsbah
Etoy hênawe yadim kake Fettah

Gutî: Ba kaxezêkî bo binêrîn
Muhîbbî sadîq e û hemrrazî dêrîn

Minîş em nameyem nûsî be te’cîl
şirrûwirr wek xerar û kone zenbîl

Be bê teswîd û teshîh û mubalat
Weku beytî bile her çonê bom hat

Bellam efkarî xom e nezmî kurdî
Le xumxaney xeyallî saf û wirdî

‘îbaratî “dehrî” û “tazî”-m nehêna
Dezanê mallî xome merdî dana

Le ber pîrî emende bêhewas im
Dellêy erkanî îslamî înas im

Ser û rîşim serapa bote lok e
Be şew hemrraz me pişmîn û koke

Xerîbî xurbetî kirdim be ewtan
Serapa erzî lê kirdûme zîndan

Welêkîn to kerîm îbnul kerîm î
Be rehmet babî eş’arî yetîmî

Eto mawê le nuqqadî wîlayet
Ewanî tir hemû bûne hîkayet

Eger Nalî bû lêre nallî awêt
Dillî Kurdî buwe gerdê le ber pêt

Minîş katê dezanî pêm hellengût
Ecel bay serrserr êmeş perrûpût

Ke name geyîye êre morman kird
Min û Fettahî dana zefman kird

Celîman nûsî erqamî wisûlî
Be ummêdî qibûlîy bêfizûlî

Refîqanim le Koye aşna nîn
Wiqûfî hallî êmey bênewa nîn

Selamêk e dîyarîman dîyar e
Le dar û berdî ew dar û dîyar e

Xisûsen astaney ercumendî
Celîzadêk e ‘Ebdulla Efendî

çi ‘Ebdulla ‘Ubeydullahî ehrar
Musexxer bendeyêk e zerr xirrîdar

Zekawet kanîyêk e toy derawî
Xetî îqrarî nûsîwe Zehawî

Melayêkî feqê yane wîqarit
Beyanit aw e, girde îqtîdarit

‘Lûmit kafî ye û şafî be wacîb
Le kiwê to debite hacîb îbnu hacîb

Le daxî to desûtê Nefteweyhî
Weku bê zerd buwe rûy Sîbeweyhî

Le meydanî fesahet to mucellî
Herîrî talî ye û Se’dî musellî

Be xeyrî ceddî êwe kîh e dana
Le Kurdistan esasî ‘îlmî dana

Were ba bêyne ser basî nîhanî
Be yadî ‘eyş û eyyamî cewanî

Be fîkrit dê zemanê çûyne Ballek
Be pêxawsî ne kewşim bû ne kallek

Le ber pêm dirrk û dar û şax û barî
Weku mexmer bû nermî ya neqallî

Ke çûyne Sîngurre Sînem girrî best
Weku qendîlî sergerdan, weku mest

Dellên êsta hewarî gurg û şêran
Weku qelbî hesûdî to ye wêran

çikawe awî pirj û golleşînî
Nemawe jiher le kotir ta şehînî

Gerûy şêxî le luqmey kuç û baran
Mu’rra ye mîsalî rozedaran

Eme dinya ye namînê heta ser
Le bo az û dana, hîz û maker

Mellê em qîsseye bê rê û hê ye
Le tirsî to nebê hêşta le kiwê ye

Le derdî dûrî û cewrî zemane
Gelê nezdîk e zor dûrî mezane

Le xom agir hellênim wek çinarok
Le çawim girye derbê wek hemamok

Be sed qeyd û hewaşî derdî dûrî
Beyanî nakirê xeyrez sebûrî

Le me û pêş şemmeyek ‘erzî etom kird
Billawe fîkr û ‘eqllim, weswesey kird

Ke wa bû çak e camey xom qeba kem
Berî dest hellbirrim rûy xom le Xuwa kem

Billêm ey razîqî mêşûle û fîl
Be heqqî Cubreîl û hem Sirafîl

Hellîkey beyreqî kurdî le dewran
Le mabeynî Kekon û Heybesulltan

Le şerq û xerbewe ta qît’ey Ko
Le ber goçamî emrit bê weku go

Dezanî zehmet e te’dadî yaran
Be sed hawîn û zistan û beharan

Dîyar e dostdaranî emin kê n
Le Xoşnaw û le Ako û deştî Bîtwên

Le ême her kesê pirsî temamî
Wekîlî mutlhqî serfî selam î

Weku min toş binûse bê te’emmul
Cewabî namekem manendî bilbil

Xerez destxettî to ye, na’îlacî
Billa me’nay nebê wek beytî Hacî