Lasam yelsik volapükakluba nolümelopik

Lasam yelsik telid volapükakluba nolümelopik pemanifom, elabom lasamis du dels tel, ed efinoms, e seks beginoms pubön, pato tefü nited penulöl bevü uts, kels ivedoms fenik dub vob neseklik e no peledivöl.

Lasam ezitom äyelo len Chautauqua Jölul 5id e 6id.

Koköm balid pemanifom fa Lecif Chas. E. Sprague ko pükat veköma pesuköl fa klemam cäla lepenädana flanü söl Chas. Currier Beale, kel pelensumom ko pid fa klub; sevälam sukana; sevälam cifelas Orville D'Orton plo tat Missouri, e söl E. W. Earle plo tat New York; pladü söls Smith e Danelson; e vob votik pebefulöl löliko dub volapük.

Täno konsidü plisenans at, kels no enoloms volapüki, jäf lemänik pedunom nelijapüko.

Lasam publügik ejafoms nitedi gletik, ibo, plä pükats lenitedik fa söls Col. Chas. E. Sprague, A. A. post, Chas. Currier Beale e votiks, penäds sölas H. B. Creed, E. D. French, J. French e votiks, pükat tidik fa söl Sprague, dub kel enünom noli vemo satik volapüka pelasamanes legletik; konlet legletik gasedas, bukas, poedotas, e dinas votik volapüka esibinom e setopam at dinas volapükik e plänam ota, in mod necalik, fa kopanans ekodom menis mödik panitedön.

Kökoms plivadik kluba ebinoms mödik e vob veütik pedunom. Komitefs mödumik pecäloms e pened suköl pesedom söle Schleyer palestimöl obas - “Volapükaklub nolümelopik in lasam yelsik telid, len jol laka Chautauqua in tat New York glidom ladliküno datuvali volapüka e levipom ome lifayelis mödik e läbik.”

Pesludos necaliko bevü kopanans plänön vödi “Volapük” me vöds nelijapükik “International language” (pük bevünetik) pla “Universal language” (pük valemik) demü mikapälüb popa tefü at, konsidöl omi malön püki te bal plo valiks.

Gased Volapük, in Boston, pemekom nogot calik kluba, e samad bal posedom kopananes valik kluba, oninlabom plotogi koköma e nüni calik.

Kopanans ebalamoms dö desän voba sitik e sek binom das gaseds lemödik in tops valk läna at opüboms kedi sugivas tels, bal a vig; e vob votik binom mostepik.

Gaseds leveütik nenumik epüboms laltügis lonedik dö lasam e dö volapük e pop vedom panitedöl.

(Penünöl fa söl F. L. Hutchins, Lepenädan kluba.)'

Se Kosmopolan 1892, Nüm: 4, Pads: 56-57.