Lasam valemik volapükakluba flentik in Paris
FLENTÄN. - Paris, 1888, balul 18.
Lasam valemik volapükakluba flentik in Paris.
Äbalüdelo, balul 15id. yela at, lasam valemik flentakluba plo pakam volapüka ezitom, düp 10 gödela, in topöp kluba de nügenels, 10, cité Rougement in Paris. Volapükels ti valik in Paris e ans se plovin äbinoms plisenik.
Koköm pábisiedom fa Söl Lourdelet kel edunom pükati nitedik dö pöfüdöf volapüka e dö pakam vifik ata in vol lölik. Bisiedel obsik dilsumälik ebinom vemo püköfik e vemo füfik, pükat omik peläsevom levemo.
Poso, Söl Roussel, sekretal kluba, eliladom plotogi lasama valemik büfik; e Söl Le Soudier, kädal, ekalügom monamedis kluba.
Fino, Söl Kerckhoffs, lepenädan obas, pakel nefenik püka obsik, epükatom lonediko e noleliko dö volapük des rig ata jünu. Eplänom e eblöfom kapäliko das pük at mostepom vadelo aiumo in nets valik. Äyelo, äsagom, älabobs volapükaklubis 105; adelo, labobs 172. Gaseds tel u kil te päredakoms volapüko; adüpo, volapükableds 13 sibinoms. Tefü vobuks pepenöl volapüko, binoms lemödik e tu fikulik al numön.
Glamats e vödabuks, Söl Kerckhoffs äfovom, pepüboms in vapüks, sägo in tükänapük e nugänapük. Glamat räbänik e vödabuk yapänik opuboms suno. Söl Kerckhoffs spelom das oyelo, if nets valik bliboms baladik bevü oms, volapük, perevidöl, pedevotöl e pebaliköl fa kademalef, obinom zesüdik al pops valik e ovedom nogan pöfüdikün plo melak tedelik, dustodik e finamik.
Volapükacif obsik pebenovipom levemo fa kopanals komitefa e pükat oka peläsevom vemo fa lilels kels laboms konfidi lölik in Söl Kerckhoffs.
Klub obsik labedom adelo kopanalis 310, kelas 57 binoms fünakopanals, 213 binoms tiädakopanals, e 40 binoms stimakopanals.
Bevü ats peväloms äbalüdelo plo Spän, sölis Iparraguirre, Ugarte e Zubiria.
Klub flentik plo pakam volapüka egevom jünu dipedi plofeda pösodes zül.
Kosteifels volapükik 35 edilsumoms in steifalam valemik mälula 5 ayela.
Volapükels 82 netas valik edilsumoms in steifalam bevünetik.
Kosteifels 16, kelas 5 pemesedoms, epenotoms lifanunodi de Jeanne d'Arc.
Volapükels 36, kelas 16 pemesedoms, epenotoms netalusagi.
Volapükels 16, kelas 6 pemesedoms, elovepoloms jeni de Joseph.
Libated e jelated pepenotoms fa kosteifels 14, kelas 5 edagetoms mesedis.
Söls Morel e Heyligers egetoms könadi bal golüdasilefik cenü könads votik pedagetöl plo vobs valik omas.
Könad golüdasilefik pegevom i Läde Pallier in Flentän plo zil ofik gönü volapük e plo düns kelis eduinof al Flentän in konsälem Münchenik.
Volapükels kels vipoms dilsumön in steifalam bevünetik yela at, openotoms yegis suköl:
- Lifanunod de Charlemagne.
- Lusag netik.
- Konlet tedapenedas 20 jü 30.
Pos sedilam mesedas, cif obsik elenunom obes das glefid, in kel, slopels valik volapüka pavüdoms, ozitom balüdelo, balul 22id, düp 7id vendela, in Grand-Hôtel, 12, Boulevard des Capucines, in Paris. Läpol binom de frans 12 a pösod.
Tidüps nulik volapüka ozitoms balüdelo, balul 29, in topöps difik.
Koköm pejötom len düp 11 e lafik gödela.
Volapükels valik, yofik e kotenik dö zel at, emogoloms ko spel kokömön in glefid yelik in kel edesänoms dlinapetön al plöb volapüka, al flenüg popas valik e al püd valemik.
Se Volapük: Gased bevünetik tedelik, nolik, literatik e gälodik 1888, Nüm: 3, Pads: 25-27.