Ladetabuk Volapükik

From Wikisource
Jump to navigation Jump to search

Ladetabuk somik luüno dila gletik vpanas tiemik, ab pato literata vpk pepübom in yel 1889 fa prof. Kerckhoffs in Paris. Buk at melidom paikomedön, bi givom lovelogami dö vpaliterat lölik epuböl jü 1889.


Täno vpaklub Hannover epübom denu ladetabuki smalik vpanas e vpaklubas vola lölik. Bukil at ebinom liedo ze nelefulik e nelefulnik, sodas no kanom givön lovelogami dö stad nuik vpamufa. Sikod klub at isludom, kopladön e pübön segivoti gletikum pemenodöl e lefulik ma mög. Diseinü atos ipotom zülagis ko säkablogs lenlägöl al vpagaseds, klubs valik ome pesevik e num vemo gletik vpanas dabalik. Desän obsik peläsevom vemo e egegetobs dili gletik säkablogas e penodis mödik. Danobs ladliküno kevobanes flenik plo yuf omsik dub gepüks, ab i dub boneds, pepelöl ya dilo biseo, pato kopanales vpakluba in Graz plo ladetalised pekopladöl ko zil e dut so gletik e vpaklube in Triest, kel ebonedom e epelom i ya samadis ladetabuka füdik plo klub e kopanal alik.


Ab deno beginot obsik no elabom seki ut, keli emutobs valadön, al kanön lautön segun bömet obsik ladetalisedi mögiküno lefulnik, kel ogivom i lovelogami velätik e kuladik dö stad anuik vpamufa su tal lölik. Klu ecedobs no mutön pübön anu somiki, bi buk demü nelefulnöf olabom te völadi pülik e no okotenom. Ye spelobs rivön glediseinis e vipis, demü kels ladetabuk esötom papübön, me gased at: Also opübobs piano lisedi vpaklubas valik vola, lisedi vpaspodelas (log. laltügi dö spod vpk.), fovo ladetis fiamas, tedadomas, fablüdas spodöl vpo ko lised glefablüdotas, canas... Te demanobs, das fiams at u pladals omas obonedoms luüno gasedi obsik.


No pidobs töbis e delidis, kelis elabobs ya nitedü püb ladetabuka; ibo eseivobs atoso vipis e cedis vpanas mödik. I egetobs mobis teldik tefü kudadins vpa valiko, plo kels danobs leigo e kelis ogebobs ma mög. Spelobs, das uts, kels epeloms ya ladetabuki füdik biseo konfidü pübam ota, obonedoms pla atos i gasedi obsik (plusuam smalik kanom pasedön täno i me potamäks nepegeböl), voto ogesedobs fläno suämis pegetöl.




Se Volapük: Gased al pakam Volapüka 1894, Nüm: 1, Pads: 5-6.