La virtù come l'è
Jump to navigation
Jump to search
Ferdinando Fontana (1850-1901)
La virtù come l'è
La sta in Porta Cines, visin ai Colonn;
sò pader el lavora in di... grapatt;
soa mader, tacand litt coi alter donn,
la ciamen 'la morosa di croatt'.
Lee per noeuv or de fila, in di Quadronn,
la sguggia in d'ona fabrica de ovatt:
tutti i pitanz ghe pararissen bonn
col pan e spuin, che l'è el sò solit piatt!
La g'ha on vestii faa de carta velina;
ma l'è bella e disposta, e (giuradina,
savenden pesg che nè ona maridada
a quindes ann!) se vun le tenta in strada,
savii cossè che ghe rispond 'sta perla?
Ehi lu, bambin d'amor, te doo ona sberla!