La viole

by Giovanni Battista Gallerio

La viole

Une rose chiare chiare,
cul so chiav pojat par tiare,
tes sos fueis invuluzzade,
come vergine velade,
no olse a fassi mai vedè. 5
E saveso qual che j’è?
È j’è l’umil violute,
che plas tant e’ Madonute.
Sclete, sclete, palidine,
cun che’ brune so viestine, 10
pâr modeste vedovele;
e pur dug la dìsin biele,
e pur dug’ la ùelin vè.
E saveso qual che j’è?
È j’è l’umil violute, 15
che plas tant e’ Madonute.
Di rosade mole mole
cul so odor je mi console:
ne lis gnozzis, fra li galis,
su lis fiestis, ne lis salis 20
dug la nàsin cun plasè.
E saveso qual che j’è?
È j’è l’umil violute,
che plas tant e’ Madonute.
Chest l’è il flor de caste spose 25
des fantatis ‘j è la rose:
dug la puàrtin e’ Madone
sul so altar, in te’ so ancone:
dug la clàmin: rose me’.
E saveso qual che j’è? 30
È j’è l’umil violute,
che plas tant e’ Madonute.
Umil rose simpri pure
in chest mond e’ j’è figure
di ches animis beadis, 35
inocenz, imacoladis,
che il Signor al chioll cun sé.
E saveso qual che j’è?
È j’è l’umil violute,
che plas tant e’ Madonute. 40
J’è l’imagine plui biele
di che’ sante Verginele,
umil tant, che je fra dutis
lis plui buinis fantazutis
al Altissin e’ plasè.
E saveso qual che j’è? 45
È j’è l’umil violute,
che plas tant e’ Madonute.

GIOVANNI BATTISTA GALLERIO (1812-1881)