La bicicletta
Andrea Verga (1811-1893)
La bicicletta
Che gust, mò, caven dalla bicicletta
sti giovinotti, per fà tant bordell?
Cont che sugh, mò, dì e nott, fan la staffetta
sonand allegrament el campanell?
Spanteghen per i strad ona sommetta
per sentinn d'ogni sort de quest e quell;
suden, slisen sul cuu pagn e bolletta;
e, di volt, ris'cen de lassagh la pell!
E che figura, infin?... dal mezz in giò,
col sgambettà, paren molletta, in truscia...
molletta, sì!... vorressen dì de no?
Dal mezz in sù paren gobbitt dannaa,
che tacchen lit; oppur gent, che se scruscia
par fà comodament... quell che va faa!