L'Autor trovandes a Turin per la causa d'on gran scior
Ironem Biragh (1691-1773)
L'Autor trovandes a Turin per la causa d'on gran scior
Oh quest sì che l'è on grand sogn
che sto pover Meneghin
l'abbia in scambi de Cologn
in sto temp de stà a Turin.
No l'è già ch'avess desgust
a stà chì per on quej mes:
el proverbi l'è tropp giust,
tutt el mond l'è on sol paes.
Anzi sont restaa confus
a vedè di bej palazz,
di bej strad drizz come fus,
di bonn ges e di gran piazz.
Gh'è anca chì di gran scioron
pien de titol e d'onor,
e no gh'han gnanch l'ambizion
de tegnì tanc servitor.
[...]