L'Autor al sur cont Antoni Besozz

From Wikisource
Jump to navigation Jump to search
L'Autor al sur cont Antoni Besozz
by Geronimo Biraghi

Ironem Biragh (1691-1773)‎

L'Autor al sur cont Antoni Besozz

Avarev de besogn, sur cont Antoni,
ch'el me deliberass d'on gran travaj;
e a dighel, senza fà tanc zerimoni,
vorev ch'el me imprestass birba e cavaj.

In sti cinqu o ses dì me premm d'andà
a Vimercaa. Sti benedett sorell
partenden che se vaghen a trovà,
oltra del pagament del sò livell.

Se gh'avess di tosann certo che mì,
puttost che metti monega lontan,
vorev rompegh el coll col dagh marì,
come fan tanti pader a Milan.

Tutt che adess l'è puttost bona la strada,
diremm al caroccee d'andà pianin,
e là, in cambi de fen o pur de biada,
trattaremm i cavaj a bescottin.

Ghe lassi a lu la leccia in quant al dì
de fà coi mee fiœu sto pocch viagg;
purchè on sabet nol sia o on venerdì;
per no disnà cont œuv e con formagg.

I monegh già se sa che volentera
veden in tucc i temp parent e amis;
ma senza paragon ghe fan pu ciera
quand ghe porten quejcoss d'ong i barbis.

Ma i compatissi anch lor: spess fan crosett
senza besogn de despiegà el mantin;
e quand ghe dan la carna, ghe dan fett
che porraven scusà per obbiadin.

El soo pur tropp che l'è mala crianza
el dagh sto grand incomod tucc i agn,
ma pur se mi vuj mantegnì l'usanza,
e se lu el m'ha inviziaa, l'è staa sò dagn.

Quej vœulta me sarev miss a l'impresa
d'andagh con la caroccia de vicciura,
se nol fudess che me rincress la spesa;
soo ch'el me credarà senza che giura.

Giacchè l'è tant portaa per famm del ben,
el preghi del favor per st'agn che chì,
postandel anch per tucc i agn che ven
fin che semm viv o mia sorella o mì.

Ma nò; per l'avvegnì nol preghi minga.
Chi sa che fors anmì, giugand al lott,
on dì no ghe pettascia ona quej stringa
e podess dì ancamò de taccà sott?