L'Autor al Pader Canzian, perfett di scœul de Brera
Jump to navigation
Jump to search
Ironem Biragh (1691-1773)
L'Autor al Pader Canzian, perfett di scœul de Brera
M'ha ditt, pader perfett, pu d'on amis
che i vers che gh'hoo promiss el stà a speccià;
el sa però quell ch'el proverbi el dis:
dò coss, promett o tend, no se pò fà.
Del debet no me sont desmentegaa
ma stantava a pagall: perchè la Musa
che vegneva inscì pronta al temp passaa
la me manda de spess a fà la scusa.
Per olter ghe soo dì che chì a Cologn,
lontan de la cittaa, mì stoo de re;
mangi quand me ven famm, dormi se hoo sogn,
perchè di seccacœur chì no ghe n'è.
Procuri tegnì cunt de sti quattr'oss,
e perchè adess comenza on poo de frecc,
me pias a la mattina a stà in reposs,
e pu del tavolin me pias el lecc.
[...]