L'è inscì!.....
| ←On vesin | L'è inscì!..... (1894) by |
In carriera→ |
Varda, Lèna, de sta in gamba
Che cont mi se scherza no;
Crèdem minga pœu inscì bamba
De vess orb come on gogò.
Vedi ben, brutta smorfietta,
Che te pias a giavanà,
Rid con tucc, fa la sciguetta,
E mi intanta lì a ciccà.
Quand te incontri a la mattin,
Fresca istess d'on bottonin,
Mezz sconduda la faccina
Sott i piumm del cappellin,
Cont quel fà de brava tosa
Che va via per i fatt sò,
Svelta, viscora, graziosa,
Foo un gran sforz a basatt nò.
Ma alla sira... quand te vedi
Là in teater a ballà...
Mezza biotta... Lèna credi
Che on quai dì me foo ligà!...
Slonga un poo quella vestinna...
L'è tropp bass quel corpettin...
Perchè mett inscì in spegginna
I tesor del to vitin?
L'è perchè te set ben fada
E te piaas a fàttel dì?
No te brusen, o sfacciada,
Tucc qui œucc adoss a ti?
Ah! te ridet?... Va, birbonna,
Te vœut propi famm dannà?
Lèmna, Lèna, sia on poo bonna,
Fa la savia, damm a trà,
Dimm almanca, sia sincera,
Te me vœuret ben on ciccin?
Sì? poss cred... propi davvera?
Dio, che stella! Cià on basin!...
Ah che asen! Quel l'è on Toni!...
Ma già i omen hin faa inscì;
«Murcia i donn! hin tucc demoni...»
E poeu dopo... mœuren lì!