Kis pöfüdos?

From Wikisource
Jump to navigation Jump to search
<Kosmopolan


MENS in läns mänifodik belogoms Volapüki nedoto de stanöps vemo difik. Kanon niludön das Yapänels speloms pato nefikulön tedi e kosadi okik ko läns votik dub Volapük; dü Cinänels ba speloms zu plakön das Volapük ovedom gebik sägo bevü stüks difik läna oksik.


Ibo segun setenam lelodas e medas votik kosada in Cinän, stüks kö dialegs vemo difik pageboms poblinoms bal nilumü votim fügiko, e täno pük nefikulik al lenadön, äs Volapük binom, kanom sejonön oki vemo pöfüdik nefikulölo tedi linedik. Kanon niludön das, ifi Volapük ovedom pük edeilöl daü vol lemänik, pogebom ba deno in läns aik kö usejonom oki pato gebik.


Jinos töbo nedön blöfi das stitam väpüka anik plo kosad bevünetik obinomöv pöfüdik menade valodiko (ebo somödo u sägo umo ka stitam lonabuka bevünetik lestänamalas bevü nafs netätas mänifodik), muton deno koefön das sibinos atimo klads semik menas kelis stitam Volapüka odämom luüno bevüniko.


Bevü klads somik binoms mens kels melitoms bodavöbi plagölo as vödals, tedadünans plo spod selanik, külels e.l.; i mens kelas feb binom tidön pükis selänik, e möd gletik dünanas e votikanas pükol[1] nelijapÜki e pükis votik selänik kelis tuvon in loteds yulopik ve vegamavegs tüdelas. Pösods at valik kanoms bülogön das, ven Volapük pogebom valemiko, febs okik poropoms mödo. (No vilobs jonön das püks selänik polenadoms no fovo pos Volapük pustitom, ab a.s. daduk tedelik onedom täno ninöfön vapüki soalo plo spod tedelik.


Vöno nindugam lelodas ätadunom vemo nitedis lönelas köcanavabas evotikanas, e natiko ats äneletoms pakami "jevala lelik" mögiküno, e no muton stunön if mens et, kels niludoms das nindukam Volapüka otadunom nitedis omsik, neletoms omi sömo.


Bal vafas omsik patik binom kof, äsliko ven klig ta lelods yunik äzitom, e vaf votik binos predön ta pöfüdöfi väpüka alik.


Zu kanon kapälön nefikulo das tedels e jäfans votik kels edagetoms sevi pükas selänik mänifodik, ba dub vob gletik, obelogoms ofen püki at negöniko kel ofägomöv alikani, pos stud du muls nemödik, duinön spod selänik sägo veitikum ka oms it: e atos, ba ekodos seili makabik flanü gaseds netapükik tefü yegs Volapükik.


Kanobs deno lekonfidön atosi, das if väpük opöfüdom jeno ed if Volapük binom fom püka pötik plo zeil at; täno, to tadun valik, Volapük ovikodom lätiko.


Tefü Talopels, tuvobs das ats belogoms kösömo studi Volapüka kösumami löliko negebik tima. Sagoms "Kis pöfüdos? Gikömobs vemo nen at;" u "Kikodo! Pükon Nelijapüki daü vol lölik, aikö golon tuvon nelijapüki papüköl."


Muton memön das mens nelijänik, kodü seit omsik depatik, no migoms mödo ko selänels. Dinamaf smalik etas, kels tävoms jeno in läns selänik, goloms mödiküno ve ruts kösömik e aipetlidöl tüdelas, kö lotedels e votikans plakoms das pöfüdos labön dinamafi dünanas kels kapäloms e pükoms Nelijapüko. Zu, ans de ets kels tävoms fetanoms okis in klubs padugöl fa vödal. Also Nelijänels gikömoms kösömo vemo nen sev püka anik plä Nelijapük.


Atos zitos nog nämikumo tefü Talopels, kels kosadoms selänelis nemödo. Selänels kelis kokömoms jeno, binoms sevokels mödiküno, o. b. Cinänels e ninlänels de Malta e Nidän, e ats elenadoms vödis nemödik pema sätik al fägön omis duinön tedi omsik. Also no binos neplänik das tuvon Talopelis so nemödik kels kanoms kapälön pöfüdi de lenadön Volapüki, bi no kokömon ofen ninlänelis Talopa kels binoms skilik tefü püks anik tudelik plä okikan; do muton koefön daseguedoms ati me vöds nulik mödik.


Ab do Nelijänels e Talopels kanoms gikömön vemo nen sevön püki anik plä okikan, deno älabomsöv dilsumäli mödikum ko selänels, plidi e tidami mödikum dub lilädön bukis e timapenädis selänik, e späli mödikum mona e fikulis nemödikum, if ba otävomsöv in seläns, üf äsevomsla mödi gletik pükas selänik. Ab lenadön mödi gletik pükas selänik odemanosöv studi du yels mödik; kludo obinosöv vemo pöfüdik if väpük bal nefikulik osibinomla dub kel pöfüds otik okanoms pagetön.


Zu, tefü ted, jinos luvelatik das gebam Volapüka as med kosada bevünetik obinomöv vemo pöfüdik e Nelijäneles e Talopeles. Binos velatik das ted paduinom atimo fa bofikans vemo sekliko nen väpük anik, ab ven mediton dö kosteiföf jalepik kel aifovom bevü letedelslänas valik, e kel omödom segun nefikuls kosada postenoms umo, län nonik dalom kotenön oki das nos nedos padunön fovo al mödön e setenön tedi okik dub nefikulön medis spoda ko seläns.


Niludobs das sesags suköl binoms velätik tefü mod dub kel fiams Nelijänik duinoms spodi selänik.


Balido, fiams Nelijänik duinoms jäfi dub Nelijapük ko fiams selänik kels spodoms in pük at; telido, fiams Nelijänik sevoms ba pükis selänik mödumik e spodoms ko fiams selänik dub püks at; e kilido, if vilon spodön in püks nog votik, tedadünans plo spod selänik pageboms as vödals, ed ats in zits mödik binoms selänels.


Jinos sibinön nepöfüds mödumik lönöl mode at spoda selänik, kels ponosoms dub nindukam väpüka.


As sam, fiams Nelijänik kels spodoms te ko fiams at kels geboms Nelijapüki, laboms vobädamis omsik vemo pesmalöl zesüdöfiko, bi fiams selänik mödik no geboms Nelijapüki; e flams Nelijänik kels tedoms te ko fiams selänik at kelas[2] sevoms pükis, mutoms paneletön tedön ko fiams vemo mödik kels spodoms te in pÜks oksik, bi no kanon spelön das fiam anik osevom pükis valik pageböl in melak.


Zu, binos distuk nepülik tima pakodöl dub stud pükas mänifodik, te plo zeils melakik, kel kanom pavitön ti löliko dub nindukam Volapüka.


Yüfön stäfi gletik tedadünanas plo spod selänik fägos fiami nedoto spodön ko läns valik, ye demanos delidis gletik e labos nepöfüdi at, das veüds jäfa vedoms pesevik pösodes kil e dins klänik kanoms pamaniföfön.


Tefü Talopels, niludobs das ted selänik omsik paduinom modiküno[3] dub fiams Nelijänik, do fiams selänik mödik eleblimoms okis in zifs gletik. Kludo Talopels oklopomsöv pöfüdi suköl de nindukam Volapüka, das okanomsöv oms it duinön tedi selänik omsik nen segivön timi vemo mödik len lenadön pükis selänik.


Tefü sesag das Nelijapük papükom daü vol lölik, e das sikö golon tuvon das Nelijapük papükom, atos kanos te binön niludam melas kels uf egoloms ga nevelo se Talop, ud kels egoloms te ve glesüts gledinik täva. Dido Nidän Britänik soalik ninlabom balions ti 285 menas kels no kanoms päkön Nelijapüki, dü Silop lemänik kobü fimän Yulopa ninlabom zu balions za 850 menas dö kels otos kanos pasesagön.


Sikodo niludobs das Volapük opöfüdomöv Talopeles boso, e das sibinos kod vemo gudik demü kel ats sötoms yufön e fodön pakami ota; pato bi ted gletik mutom vedön füdo bevü Talop e Silop lefüdik, e bi ted at, ifi votikan nonik, ponefikulomöv vemo dub gebam Volapüka.



NOETS. (Vükifonät)

  1. Bükapök; pla: püköl.
  2. Jiniko bükapök; pla: kels.
  3. Bükapök; pla: mödiküno.


Se Kosmopolan 1891, Nüm: 2, Pads: 1-3.