Keyneka Zonaya

From Wikisource
Jump to navigation Jump to search

Di merdîm cehdi ra şînî, şînî vêr yew kaş. O yew vano "Ma yew dozer dûn inî kaşî r' ti ra şînî." O bîn iz vano "Xeberon herîtî medi!" Vano "Temam, mi çîk niva!"

Şînî vêr awki. Vano "De vinder, ma yew benî pird, yew zî ser a şînî." O bîn heyna vano "Mi to ra va xeberon herîtî mevaji!"

Heyna dewam kenî, şînî nizdî yew dewi. Vano "Ez meymanê to ya nu ti meymanê min î?" O ki a dewi ra yo, ê xerîbî ra vano "De xeberon herîtî mevaji, to ewro xwura sarey' mi dejnawo, ti şinî ça şû!"

Yew keynayê ey esta, şino keyê keyna, vano "De yew piranê nanî bîyar ez biwêr. Xwura ewro sarey' mi bîyo de." Keyna vana "Xêyr o, se biyo?" Babîyê ya vano "Mi ti ra vato yew piranê nanî bîyar, xwura ez yew gêj a." Keyna zî vana "Ti heta mevajî ez nan nêana."

Babîyê ya vano "Ez şîya, mêrikêk raştê mi ame, mi ra va, dê bê ma yew dozer bîyar, ma ini kaşî re pirod, ma dewam biker." Keyneki vana "Mêrikî to ra vato ma xwu rê qisey kenî, ma vejîyenî lewe."

Babîyê keyneki vano "Ci ra pey, ma dewam kerd, ma ameyî verî yew awki. Mi ra va ma tîya de yew benî pird yew zî ser a şinî." Keyneki vana "Temam bawo, mêrikî vato, ma heta wur di zî xwu kenî awki mîyan, benî hî, ma yew xwu kenî pird yew iz xwu kenî paştî ser, şinî."

Babîyê keyneki vano "Temam, ê di hebî meselayê ke mi to ra vatî, to cewab da. Labelê ma şî dewi, keyê mêrikî, mi ra vat, ez beno meymanê to nu ti bên meymanê mi?" Keyneki vana "Ti heta nêşîrî, ê merdimî mêyarî îta, ez to ra nêvana."

Merdim warzeno şino. Gêreno ê merikî bîyaro keyê xwu, rayîr de xwu rê fikirîyeno, vano, ez zor-bela ê mêrikî ra xelisîyewa, ez heyna şina gêrena ê merikî. La peynî de şino mêrikî vîneno, ano keyê xwu. Mêrik yeno zere, ewnîyeno pirnikê keyneki ra, vano "Ino keyê to rind o, labelê lojinê yi çowt a." Babîyê keyneki vano "Mi to ra va ino merdim ma rê lazim nîyo!" Keynek iz vana "Lojinê ma çowt a labelê dumon xwu raşt ancena."

Mêrik iz paşayê xwu rê gêreno yew cînî, vano "Mi paşayî rê yew cînî dî." Mêrik warzeno şino verî paşeyê xwu, vano "Paşay' mi, mi to rê yew keyneki dîya."

O û paşa pîya şînî keyê mêrikî, keyneki wazenî. Babîyê keyneki aye dano. Şinê keyneki pê astor a bên şînî vêr berî. Keyneki astor ra yena war labelê nêşina zere, şar şino paşay' ra vano "Keyneki nîna zeri." Paşa zî aqil o, fehm keno. Paşa şino keyneki ra vano "Bê zeri, ez çi rey to ra nêvana. Ez paşa wa, ti yew keynek a, yew nêzûn a."