Kaulana Nā Pua

From Wikisource
Jump to navigation Jump to search
Kaulana Nā Pua  (1893) 
Eleanor Kekoaohiwaikalani Wright Prendergast (1865 - 1902)

Kaulana nā pua aʻo Hawaiʻi
Kūpaʻa mahope o ka ʻāina
Hiki mai ka ʻelele o ka loko ʻino
Palapala ʻānunu me ka pākaha

Pane mai Hawaiʻi moku o Keawe
Kōkua nā Hono aʻo Piʻilani
Kākoʻo mai Kauaʻi o Mano
Paʻapū me ke one Kākuhihewa

ʻAʻole aʻe kau i ka pūlima
Maluna o ka pepa o ka ʻenemi
Hoʻohui ʻāina kūʻai hewa
I ka pono sivila aʻo ke kanaka

ʻAʻole mākou aʻe minamina
I ka puʻukālā a ke aupuni
Ua lawa mākou i ka pōhaku
I ka ʻai kamahaʻo o ka ʻāina

Mahope mākou o Liliʻulani
A loaʻa e ka pono o ka ʻāina[1]
Haʻina ʻia mai ana ka puana
Ka poʻe i aloha i ka ʻāina

Notes[edit]

  1. alternate stanza: A kau hou ʻia e ke kalaunu


PD-icon.svg This work was published before January 1, 1927, and is in the public domain worldwide because the author died at least 100 years ago.