Kamol

by Komil Xorazmiy

Kamol by Komil Xorazmiy

Emas kishiga bu dunyoga mulk-u mol kamol,
Husuli ilm-u hunar keldi bezavol kamol.

Ulumdin sharafi oxirat emasdur yolg‘uz,
Ki munda ham sababi izzat-u jalol kamol.

Murod ma’rifatullohdur taallumdin,
Emas mubohasa-u jang ila jidol kamol.

Kamol ma’nisi tahsili ilmi holdurur,
Na hosil aylagusi mahzi qiyl-u qol kamol.

Zamiring ayla musaffo kadardin oyinadek,
Desangki jilvagar etsun anga jamol kamol.

Bo‘lurmu sho‘ra zamin ob-u donadin xurram,
Xabis tab‘g‘a topmak base mahol kamol.

Kamol bergusidir so‘zga shuhrat-u ta’sir,
Bu qushg‘a qilg‘ali parvoz parubol kamol.

Niholi bebari sarkashdurur avomunnos,
Ne sud topmasa ma’nig‘a ittisol kamol.

Ko‘rub g‘azalda Bayoniy musaddasin Komil,
Dediki: «Bergay anga hayyi loyazol kamol».