kalama sin #5
tenpo mun monsuta
tan jan Teni
toki. mi jan Deni tan ma pona pi toki pona.
o kama pona tawa kalama sin nanpa luka.
kalama sin ni la mi toki e tenpo mun monsuta pi ma Mewika. taso, tenpo mun monsuta li seme? tenpo ni li nasin musi pi ma Mewika. toki Inli la, nimi li "Halloween". jan mute pi toki pona li tan ma ante la, mi wile pana sona e nasin ni
nasin musi pi tenpo mun monsuta la, jan li pali e seme? jan mute li pali e ijo ante tawa ona.
kulupu mute la, jan lili en jan suli li pali e ijo ante. jan lili li pali e ni: ona li kepeken len musi li tawa nasin tomo. tawa la, jan lili li toki e ni tawa jan tomo: o pana e suwi tawa mi, anu mi ike e sina. toki Inli la, ni li "Trick or treat".
jan tomo li pana e suwi.
len musi la, ona li seme? mute li ken. len musi li ken musi lukin, li ken monsuta lukin.
pali pi jan suli la, mute li ken kin. jan mute li kepeken ijo musi lon tomo ona tawa ni: tomo li musi lukin li monsuta lukin. ona li kama e tenpo musi pi jan mute lon tomo ona. ike la, tenpo musi li ken ala, tan jaki Kolona
musi mute li pona tawa tenpo ni. jan li ken toki e musi monsuta, li ken lukin e sitelen tawa monsuta. jan mute li wile pilin monsuta tan musi ni.
kin la, ijo mute li pona kin tawa tenpo ni. soweli lili pimeja en jan usawi ike en jan moli tawa en ijo ante mute li pona. ijo musi la, wan li suli; kili suli pi loje jelo. kili ni la, jan li kipisi e ona. kipisi la, ona li kama sinpin jan lukin. sinpin ni kin li ken musi lukin li ken monsuta lukin. jan li weka e insa kili, li pana e ilo suno lon insa. tenpo pimeja la, lupa sinpin kili li suno. toki Inli la, nimi pi kili ni li "jack-o-lantern"
tenpo sike suno la, tenpo mun li lon open pi tenpo lete lon ma mi. lipu pi kasi suli li kama kule ante, li tawa ma tan luka kasi. kon li kama lete. taso ko lete li open ala.
tenpo mun ni li pona suli tawa mi. sina pona tan kute. awen pona!
