Kai nua Cemas

From Wikisource
Jump to navigation Jump to search

kai nua Cemas

kai nua Cemas a pinayuanan

sinipasemalaw tua patjara siisiu[edit]

maleva itjen tua kiljivak nua Cemas, pai tua kina izuanan nua pinayuanan a vaquan a kai nua Cemas a kemasi sika 20 a cavilj (1973) ka tjaisanas a patje tucu, masa kai nua Cemas saka namayatucu anga a nameqaca a napupicul anga a kiukai, a saluan nua marka sinzia a mapuljat. qau kumalji a kinaikacauanan a sikudan, katua vinarungan nua taqaljaqaljan a mapuljat, kudral aravac a kinamaumaljan a paqulid. qau aicu a penuljat mana tja sikasalu tu" aicu a kai nua Cemas mavan a nasi, mavan a sapui a teljar a paquljaqulja tua djalan nua caucau" azua aya kai naseminalu a paqulid. ljakua, ayatua neka nu pinayuanan a tjaisangas a sinikieces nua Cemas, manasika aicu a patjara sengsengan: a lemingdelj tua qapulu nua saluan na sinzia; a kunring tua kisekaulj tua Cemas; katua paljaluai tua namaqacuvung a tulu nua Cemas, inika mapadjaljudjaljun. kemeljang itjen tu tjuruvu a sinzia a macaqu a pacun a semupu tua siisiu a ljinautjiyan (ciniukukuan), a rinipungan, a inigirisan (inamilikan), ljakua, ayatua inika nitjen azua kai, manasika, tjara izua sakamaya a papatjezuan nua tja kinljangan nua tja siljaluayan tua zuma nu kaiyan; qau siayanga a izua tjuruvu aravac a marka caucau a namaqusaw tu gemaugaw tua namakakaizuazua a manguaqan nua Cemas itua tjaisangas a sinikieces a kai, pai aicu a namayatucu a qusavan, nakuya nu inika a tja kinemenemen, manasika, tjaljananguaqan a izua za nitjen a pinayuanan a kai nua Cemas, tua sika mapasusuan nua varung na Cemas itua semupusupu a taqalljaqaljan.

aicu a sengsengan hunyaku tu pinayuanan a siisiu a patje maqacuvung ki izua 6 a cavilj, pai napacun itjen uta tua vincikan tua rumazi a sasupuin a siisiu a senai katua vincikan tua patjara ti ruc, pai nakicaquan itjen sa tje ka matavakanga tua rumazi, masalu itjen tu aicu a tja kinitavakan a pacun a semupu tua rumazi tjara ta sikamanguaq aravac a pitua tja kitulu tua siisiu nu tjaivililj.

aicu a sihunyakuan tua pinayuanan a siisiu sinikilaing tua kinarasudj nua siisiu kukai i zinsikai a siki pusengsengan. qau a kai nua siisiu sinikilaing tua hinibelayan katua hiniliasan a siisiu, sa pakakiamavi uta katua zuma siisiu a ljinautjiyan (ciniukukuan), inigirisan (inamirikan), katua rinipungan. aza i vililj taicu a pinayuanan a siisiu, izua vincikan a paljaluai tua marka ngadan, tua cavilj nua marka caucau katua qinaljan, izua uta zinugan tua marka kadjunangan itua siisiu.

aicu i maza, izua za masan 4 a patjara mavan aicu a pinayuanan a siisiu, a nakuya nu inika tja keljangen:

(1) aicu a pinayuanan a siisiu sinikilaing tua uri makaya ljemaluai a semupusupu a mapuljat tua kai a sini papuvarung nua Cemas tua navencik tusa siisiu.

(2) aicu a pinayuanan a siisiu, sinikilaing tua uri sema varung tua pacucun tusa kai nua Cemas, manasika peniliq tua madjele a kai, saka maru qivuivu anga Cemas tua tja ljinaluai a kai nu semupu itjen.

(3) aicu a pinayuanan a siisiu izua sinipaljaluai a menadjele tua patjara vincikan a penuljat, tua tja sikeljangan tu anema tulu nuazua vincikan.

(4) aicu a pinayuanan a siisiu, nekanga nu "Yihuva" aya ngadan nua Cemas, "Cemas" inayanga a penuljat. aicu a siqaqivuan sinikilaing tua kakudan nua israil a caucau a marekutj, a paqaljai a tjemarungadan tua Cemas, saka mava aicu a kinilaingan a inika tjemarungadan tua Cemas a paka ti "Yihuva".


aicu a siisiu, sinavidan tua rumazi a pinayuanan a kai, neka nu linautjiyan (ciniukukuan), a siayatucu: ulja maru qivuivu a Cemas tua varung a paka tua pinayuanan a kai inayan; ulja makeljang a kinanguaq nua sinipagaugaw nua Cemas a pinayuanan a kai, sa tje patatulutuluan, saka inika maqulip inayan uta.


nu pacunanga itjen taicu a pinayuanan a siisiu, palemek a tjuruvu a pasa samalji tua inika izua penuljat a tjaisangas a sinikieces a kai nua Cemas, ljakua, a patjara aicu, masalu itjen tu inika uri cuai sa qacuvungi a hunyaku, sa patjeluqan a qemacuvung.


kiqaungi tua Cemas, tu ulja pinapupiculan nua taljaparavacan a Vavak a kiukai nimadju katua marka namasalu a mapuljat, saka uri namitatekuan, uri namasilevan a gemaugaw tua tulu itua siisiu, sa pasusu tua varung nua Cemas, ayatua" aicu a marka vincikan itua siisiu a penuljat, a sinipapuvarung nua Cemas tazua marka navencik, sikamanguanguaq nu situlu, nu sipakipapaulingaw, nu sipapenguaq tua nakuyakuya kakudan, nu sitavak tua nanguangauq a kakudan saka mavan a sikanamacaquan angata nua sasekauljan na Cemas, saka nasedjaljepanga a kipusengsengan tua nanguanguaq a penuljat.

(1 timuti 3:16-17)

tjaisangas a sinikieces nua Cemas a kai[edit]

vaquan a sinikieces nua Cemas a kai[edit]