K čemu stary zešědźiwi
So jasnje nětko zyma slěbori
a wšitke hona z płachtu krywa sněžnej,
so wšo we slěbrobłyšću zyboli
na wšitkich stomach, hałžkach z pychu něžnej.
Što z tajkej pychu zyma zwobaluje?
Nic zemje sprostnjeneje womoru?
A što nam w slěbrobłyšću wozjewjuje?
Nic Božu wulku, dźiwnu krasnotu?
Tak šědźiwosć tež staroh dopomnjuje
na jeho ćěła blisku morwotu,
a włosow bělenje joh pokazuje
na wulku njebja krasnosć přichodnu,
hdźež rjeńše nalěćo tu po zymi
so w njezachodnym błyšću zeleni!
- Author: Julius Eduard Wjelan (public domain)
- Source: http://edition-elf.de/forum/showthread.php?tid=5136