Jv/Kakawin Nāgarakṛtâgama/Pupuh 17

From Wikisource
Jump to navigation Jump to search
Kakawin Nāgarakṛtâgama by Mpu Prapañca
Pupuh 17

Pupuh 17 – Jagaddhita

1.

  • a. sāmpun rabḍa pagĕhnyadĕg nṛpati ring Yawaḍaraṇi jayêng digantara
  • b. ngkāne śrī Phalatiktanāgara sirān siniwi mulahakĕn jagaddhitā
  • c. kīrṇa ikang yaśa kīrti dharma ginaweniran anukhani buddhining para
  • d. mantrī wīpra bhūjangga sang sama wineh wibhawa tumut akīrti ring jagat

2.

  • a. göngning wīrya wibhūti kagraha tĕkap nṛpati tuhu tuhûttama prabhū
  • b. lilā nora kasangśayāniran anamtami sukha sakaharṣaning manah
  • c. kānyā sing rahajöng ri Janggala lawan ri Kaḍiri pinilih sasambhawa
  • d. astām tang kahañang sakêng parapurā sing arĕja winawe dalĕm purī

3.

  • a. salwāning yawabhūmi tulya nagarī sasikhi ri pangadĕg narādhipā
  • b. mewwiwwang janadeśa tulya kuwuning bala mangidĕr i khaṇṭaning purī
  • c. sang lwirning paranuṣa tulya nika thāniwiṣaya pinahasuka inaris
  • d. lwir ūdyana tikang wanādri sahananya jinajar hira tan panangśaya

4.

  • a. bāryyan māsa ri sāmpuning śiśirikāla sira mahas-ahas macangkrama
  • b. wwantĕn thāny angaran ri sima kidul i jalagiri mangawetan ing purā
  • c. rāmyâpan papunnagyaning jagat i kālaning sawung ika mogha tan pĕgat
  • d. mwang wewe pikatan ri caṇḍi lima lot paraparanira tuṣṭa lālana

5.

  • a. yan tan mangka marêng phalah marĕk i jöng hyang acalapati bhakti sādara
  • b. pantĕs yan panulus ḍatĕng ri balitar mwang i jimur i śilāhrit alĕngöng
  • c. mukyang polaman ing dahe kuwu ri linggamarabangun ika lanenusī
  • d. yan ring Janggala lot sabhā nṛpati ring Surabhaya manulus mare buwun

6.

  • a. ring śākākṣatisūrya sang prabhū mahas ri Pajang iniring ing sanāgara
  • b. ring śākāngganagaryamā sira marê Lasĕm ahawan i tīraning pasir
  • c. ri dwārādripanendu palĕngĕngirêng jaladhi kidul atūt wanālaris
  • d. ngkānêng loḍaya len tĕtör i siḍĕman jinajahira langönya yênitung

7.

  • a. ndān ring śāka śaśangka nāga rawi bhadrapadamasa ri tambwanging wulan
  • b. sang śrī Rājasanāgarān mahas-ahas ri Lamajang angitung sakendriyan
  • c. sakweh śrī Yawarāja sapriya muwah tumut i haji sabhṛtyawāhana
  • d. mantrī taṇḍa sawilwatikta nguniweh wiku haji kawirājya mangdulur

8.

  • a. ngkāng teking maparab Prapañca tumut anglĕngĕng angiring i jöng nareśwara
  • b. tan len sang kawi putra sang kawi samênaka dinulur anānmatêng mangö
  • c. dharmādhyakṣa kasogatan sira tĕkap narapati sumilih ri sang yayah
  • d. sakweh sang wiku boddha mangjuru paḍângatuturakĕn ulahnirêng dangu

9.

  • a. ndān tingkah rakhawīn marĕk ri haji dug raray atutur aśewa tan salah
  • b. pinrihnyê hati rakwa milwa saparā narapatin amalar kasanmatā
  • c. nghing tapwan wruh apet langö pisaningun tĕtĕsa maminta gīta ring karas
  • d. nā hetunya kamārṇa deśa sakamarga ngaranika riniñci tūt hawan

10.

  • a. tāmbening kahawan winārṇa ri Japan kuṭi kuṭi hana caṇḍi sāk rĕbah
  • b. wetan tang têbu pāṇḍawan ri daluwang babala muwah hi kañci tan madoh
  • c. len têkang kuṭi rātnapangkaja muwah kuṭi haji kūṭi pangkajâdulur
  • d. pañjrak maṇḍala len ri pongging i jingan kuwu hañār i samipaning hawan

11.

  • a. prāptêng dharma ring pañcaśara tumuluy ḍatĕng i kapulungân sirâmĕgil
  • b. ndān lampah rakawin lumāryâmĕgil ing waru ri hĕring i tira tan madoh
  • c. anggânggĕhnya tĕkap bhaṭāra kuṭi ring suraya pagĕh mara cinārcakĕn
  • d. nghing rakwan kasĕlang turung mulih amogha matutur atisāmbhramêng mangö