Jv/Alkitab/Purwaning Dumadi/24

^24:1 ꦏꦼꦕꦿꦶꦠ​꧊ꦄꦧꦿꦲꦩ꧀ꦮꦶꦱ꧀ꦱꦼꦥꦸꦃꦧꦔꦼꦠ꧀꧉​ꦲꦶꦁꦱꦧꦫꦁꦠꦸꦩꦶꦤ꧀ꦢꦏ꧀ꦏꦺꦧꦶꦤꦼꦂꦏꦃꦲꦤ꧀ꦢꦺꦤꦶꦁꦄꦭ꧀ꦭꦃ꧉​

^24:2 ꦲꦶꦁꦱꦮꦶꦗꦶꦤꦶꦁꦢꦶꦤ​꧊ꦄꦧꦿꦲꦩ꧀ꦤꦶꦩ꧀ꦧꦭ꧀ꦭꦶꦲꦧ꧀ꦢꦶꦤꦺꦱꦶꦁꦠꦸꦮꦝꦺꦮꦺ꧈​ꦱꦶꦁꦢꦶꦥꦽꦕꦪꦔꦸꦫꦸꦱ꧀ꦧꦤ꧀ꦝꦤꦺꦏꦧꦺꦃ꧈​ꦢꦶꦏꦺꦴꦤ꧀ꦱꦸꦩ꧀ꦥꦃꦱꦿꦤꦤꦸꦩ꧀ꦥꦁꦔꦏꦺꦠꦔꦤ꧀ꦤꦺꦲꦶꦁꦱꦔꦶꦱꦺꦴꦂꦫꦶꦁꦕꦼꦛꦶꦏ꧀ꦏꦺ​꧊ꦄꦧꦿꦲꦩ꧀꧉​

^24:3 ꦠꦼꦩ꧀ꦧꦸꦁꦔꦺ꧈​"ꦱꦸꦩ꧀ꦥꦃꦲꦢꦼꦩꦶꦄꦭ꧀ꦭꦃꦲꦶꦁꦱ꧀ꦮꦂꦒꦭꦤ꧀ꦧꦸꦩꦶ꧈​ꦪꦺꦤ꧀ꦏꦺꦴꦮꦺꦲꦺꦴꦫꦲꦉꦥ꧀ꦔ꧀ꦒꦺꦴꦭꦺꦏ꧀ꦏꦏꦺꦗꦺꦴꦝꦺꦴꦲꦤꦏ꧀ꦏꦸ​꧊ꦆꦱ꧀ꦏꦏ꧀꧈​ꦮꦺꦴꦁꦮꦢꦺꦴꦤ꧀ꦠꦤꦃ​꧊ꦏꦺꦤꦲꦤ꧀ꦏꦺꦤꦺ꧉​

^24:4 ꦭꦸꦔꦲꦩꦼꦚꦁꦠꦤꦃꦏꦼꦭꦲꦶꦂꦫꦤ꧀ꦏꦸ꧈​ꦲꦤꦏ꧀ꦏꦸꦒꦺꦴꦭꦺꦏ꧀ꦤꦗꦺꦴꦝꦺꦴꦱꦏꦲꦤ꧀ꦠꦫꦤꦺꦱꦤꦏ꧀ꦱꦼꦢꦸꦭꦸꦂꦏꦸ꧉"​

^24:5 ꦲꦧ꧀ꦢꦶꦩꦲꦸꦤꦸꦭꦶꦩꦠꦸꦂ꧈​"ꦏꦢꦺꦴꦱ꧀ꦥꦸꦤ꧀ꦢꦶꦩꦼꦤꦮꦶꦭꦫꦺꦲꦺꦱ꧀ꦠꦿꦶꦤꦶꦥꦸꦤ꧀ꦩ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦢꦶꦥꦸꦤ꧀ꦲꦗꦏ꧀ꦩꦿꦶꦏꦶ;ꦩꦼꦤꦥꦥꦸꦠꦿꦥꦚ꧀ꦗꦼꦤꦼꦁꦔꦤ꧀ꦭꦗꦼꦁꦏꦸꦭꦲꦗꦏ꧀ꦩꦿꦶꦏ?"

^24:6 ꦤꦁꦔꦶꦁ​꧊ꦄꦧꦿꦲꦩ꧀ꦩꦁꦱꦸꦭ꧀ꦭꦶ꧈​"ꦲꦤꦏ꧀ꦏꦸꦲꦗꦥꦶꦱꦤ꧀ꦥꦶꦱꦤ꧀ꦏꦺꦴꦏ꧀ꦒꦮꦩꦿꦤ!

^24:7 ꦩꦼꦂꦒꦄꦭ꧀ꦭꦃꦲꦶꦁꦱ꧀ꦮꦂꦒꦮꦶꦱ꧀ꦤ꧀ꦝꦮꦸꦃꦲꦶꦱꦸꦥꦪꦲꦏꦸꦤꦶꦁꦒꦭ꧀ꦧꦭꦺꦲꦺꦴꦩꦃꦲꦺꦧꦥꦏ꧀ꦏꦸ꧈​ꦧꦁꦱꦏꦸꦭꦤ꧀ꦤꦼꦒꦫꦏꦸ꧈​ꦱꦂꦠꦥꦫꦶꦁꦥꦽꦗꦚ꧀ꦗꦶꦏ꧀ꦭꦮꦤ꧀ꦱꦸꦩ꧀ꦥꦃ꧈​ꦪꦺꦤ꧀ꦧꦏꦭ꧀ꦩꦫꦶꦁꦔꦏꦺꦤꦼꦒꦫꦲꦶꦏꦶꦩꦫꦁꦲꦤꦏ꧀ꦠꦸꦫꦸꦤ꧀ꦏꦸ꧉​ꦥꦚ꧀ꦗꦼꦤꦼꦁꦔꦤ꧀ꦤꦺꦥꦶꦪꦩ꧀ꦧꦏ꧀ꦧꦏꦭ꧀ꦔꦸꦠꦸꦱ꧀ꦩꦭꦲꦺꦏꦠ꧀ꦠꦺꦤ꧀ꦝꦶꦱꦶꦏ꧀ꦏꦶꦭꦏꦸꦩꦸ꧈​ꦠꦼꦩꦃꦲꦶꦁꦏꦤꦏꦺꦴꦮꦺꦧꦏꦭ꧀ꦏꦼꦠꦼꦩꦸꦏꦫꦺꦴꦧꦺꦴꦕꦃꦮꦢꦺꦴꦤ꧀ꦱꦶꦁꦒꦼꦊꦩ꧀ꦢꦶꦥꦺꦏ꧀ꦧꦺꦴꦗꦺꦴꦲꦤꦏ꧀ꦏꦸ꧉​

^24:8 ꦢꦺꦤꦺꦪꦺꦤ꧀ꦧꦺꦴꦕꦃꦮꦢꦺꦴꦤ꧀ꦩꦲꦸꦲꦺꦴꦫꦒꦼꦊꦩ꧀ꦏꦺꦴꦏ꧀ꦒꦮ꧈​ꦏꦺꦴꦮꦺꦭꦸꦮꦂꦱꦏꦱꦸꦩ꧀ꦥꦃꦩꦸꦲꦶꦏꦶ꧉​ꦤꦁꦔꦶꦁꦲꦗꦥꦶꦱꦤ꧀ꦥꦶꦱꦤ꧀ꦲꦤꦏ꧀ꦏꦸꦏꦺꦴꦏ꧀ꦧꦭꦺꦏ꧀ꦏꦏꦺꦩꦼꦚꦁꦤꦼꦒꦫꦲꦱꦭ꧀ꦏꦸ꧉"​

^24:9 ꦲꦧ꧀ꦢꦶꦩꦲꦸꦧꦚ꧀ꦗꦸꦂꦤꦸꦩ꧀ꦥꦁꦔꦏꦺꦠꦔꦤ꧀ꦤꦺꦲꦤꦲꦶꦁꦱꦔꦶꦱꦺꦴꦂꦫꦶꦁꦕꦼꦛꦶꦏ꧀ꦏꦺ​꧊ꦄꦧꦿꦲꦩ꧀꧈​ꦧꦼꦤ꧀ꦢꦫꦤꦺ꧈​ꦭꦤ꧀ꦱꦸꦩ꧀ꦥꦃꦪꦺꦤ꧀ꦲꦉꦥ꧀ꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦢꦶꦝꦮꦸꦃꦲꦏꦺꦧꦼꦤ꧀ꦢꦫꦤꦺ꧉​

^24:10 ꦲꦧ꧀ꦢꦶꦩꦲꦸꦧꦚ꧀ꦗꦸꦂꦧꦸꦝꦭ꧀ꦔ꧀ꦒꦮꦲꦸꦤ꧀ꦠꦱꦼꦥꦸꦭꦸꦃꦢꦶꦩꦺꦴꦩꦺꦴꦠ꧀ꦠꦶꦫꦗꦧꦿꦤꦫꦸꦥꦫꦸꦥ꧉​ꦭꦏꦸꦤꦺꦔꦼꦤꦼꦂꦠꦤꦃ​꧊ꦄꦫꦩ꧀​꧊ꦤꦲꦫꦪꦶꦩ꧀꧈​ꦱꦶꦁꦧꦶꦪꦺꦤ꧀ꦢꦶꦲꦼꦁꦒꦺꦴꦤ꧀ꦤꦶ​꧊ꦤꦲꦺꦴꦂ;ꦢꦸꦤꦸꦁꦔꦺꦲꦶꦁꦱꦭꦺꦴꦂꦫꦺ​꧊ꦩꦺꦱꦺꦴꦥꦺꦴꦠꦩꦶꦪ꧉​

^24:11 ꦱꦠꦼꦏꦤꦺꦲꦶꦁꦏꦺꦴꦤꦺꦴꦲꦸꦤ꧀ꦠꦤꦺꦢꦶꦗꦼꦫꦸꦩ꧀ꦩꦏꦺꦲꦤꦲꦶꦁꦱꦕꦼꦝꦏ꧀ꦏꦺꦱꦸꦩꦸꦂ꧉​ꦤꦭꦶꦏꦱꦼꦩꦺꦴꦤꦺꦴꦮꦶꦱ꧀ꦱꦺꦴꦫꦺ꧈​ꦮꦪꦃꦲꦺꦮꦺꦴꦁꦮꦢꦺꦴꦤ꧀ꦥꦝꦠꦼꦏꦔꦁꦱꦸꦲꦶꦁꦱꦸꦩꦸꦂꦩꦲꦸ꧉​

^24:12 ꦲꦧ꧀ꦢꦶꦩꦲꦸꦤꦸꦭꦶꦤ꧀ꦢꦼꦢꦺꦴꦔ꧈​"ꦝꦸꦃꦲꦭ꧀ꦭꦃꦲꦶꦥꦸꦤ꧀ꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧉​ꦏꦸꦭꦚꦸꦮꦸꦤ꧀ꦠꦸꦭꦸꦁꦩꦸꦒꦶꦲꦼꦁꦒꦺꦤ꧀ꦏꦸꦭꦏꦲꦸꦠꦸꦱ꧀ꦲꦁꦱꦭ꧀ꦭꦢꦩꦼꦭ꧀꧉​ꦏꦼꦂꦱꦲꦔꦽꦤ꧀ꦠꦃꦲꦏꦼꦤ꧀ꦱꦶꦃꦝꦠꦼꦁꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧉​

^24:13 ꦏꦸꦭꦧꦝꦺꦔꦼꦤ꧀ꦠꦺꦴꦱ꧀ꦱꦶꦮꦺꦴꦤ꧀ꦠꦼꦤ꧀ꦲꦶꦁꦱꦸꦩꦸꦂꦔꦿꦶꦏꦶ꧈​ꦭꦤ꧀ꦱꦼꦏꦼꦝꦥ꧀ꦩꦭꦶꦃꦭꦫꦺꦭꦫꦺꦲꦺꦱ꧀ꦠꦿꦶꦱꦏꦶꦁꦝꦸꦱꦸꦤ꧀ꦧꦝꦺꦝꦠꦼꦁꦔꦁꦱꦸ꧉​

^24:14 ꦏꦸꦭꦧꦝꦺꦮꦶꦕꦤ꧀ꦠꦼꦤ꧀ꦝꦠꦼꦁꦱꦭꦃꦱꦼꦠꦸꦁꦒꦭ꧀ꦭꦶꦁꦭꦫꦺꦲꦺꦱ꧀ꦠꦿꦶꦮꦲꦸ꧈​‘ꦲꦏꦸꦮꦺꦤꦺꦃꦲꦤꦔꦺꦴꦩ꧀ꦧꦺ’꧉​ꦩꦼꦤꦮꦶꦭꦫꦺꦲꦺꦱ꧀ꦠꦿꦶꦮꦲꦸꦩꦁꦱꦸꦭ꧀ꦭꦶ꧈​‘ꦩꦁꦒꦏꦸꦭꦲꦠꦸꦂꦫꦶꦔꦸꦚ꧀ꦗꦸꦏ꧀꧈​ꦩꦭꦃꦲꦸꦤ꧀ꦠꦲꦸꦤ꧀ꦠꦱꦩ꧀ꦥꦺꦪꦤ꧀ꦲꦶꦁꦒꦶꦃꦧꦝꦺꦏꦸꦭꦱꦸꦏꦤꦶꦔꦺꦴꦩ꧀ꦧꦺꦥꦶꦱꦤ꧀’꧍​ꦩꦼꦤꦶꦏꦢꦢꦺꦴꦱ꧀ꦥꦽꦠꦤ꧀ꦝꦧꦶꦭꦶꦃꦭꦫꦺꦮꦲꦸꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦏꦼꦂꦱꦏ꧀ꦏꦏꦼꦤ꧀ꦢꦢꦺꦴꦱ꧀ꦗꦺꦴꦝꦺꦴꦤꦶꦥꦸꦤ꧀ꦧꦼꦤ꧀ꦢꦫꦏꦸꦭ​꧊ꦆꦱ꧀ꦏꦏ꧀꧉​ꦱꦿꦤꦩꦼꦏꦠ꧀ꦠꦼꦤ꧀ꦏꦸꦭꦔꦼꦂꦠꦺꦴꦱ꧀꧈​ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦤꦼꦠꦼꦥ꧀ꦥꦶꦥꦽꦗꦚ꧀ꦗꦶꦪꦤ꧀ꦥꦚ꧀ꦗꦼꦤꦼꦁꦔꦤ꧀ꦏꦭꦶꦪꦤ꧀ꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧉"​

^24:15 ꦏꦼꦕꦿꦶꦠꦱꦢꦸꦫꦸꦁꦔꦺꦲꦧ꧀ꦢꦶꦩꦲꦸꦫꦩ꧀ꦥꦸꦁꦲꦼꦁꦒꦺꦴꦤꦺꦤ꧀ꦢꦼꦢꦺꦴꦔ꧈​ꦲꦤꦧꦺꦴꦕꦃꦮꦢꦺꦴꦤ꧀ꦠꦼꦏꦚꦸꦁꦒꦶꦗꦸꦤ꧀꧈​ꦗꦼꦤꦼꦁꦔꦺ​꧊ꦫꦶꦧ꧀ꦏꦃ꧈​ꦲꦤꦏ꧀ꦏꦺ​꧊ꦧꦺꦠꦸꦮꦺꦭ꧀꧉​꧌​꧊ꦧꦺꦠꦸꦮꦺꦭ꧀ꦏꦸꦮꦶꦲꦤꦏ꧀ꦏꦺ​꧊ꦩꦶꦭ꧀ꦏ꧈​ꦧꦺꦴꦗꦺꦴꦤꦺ​꧊ꦤꦲꦺꦴꦂ꧈​ꦲꦝꦶꦤꦺꦭꦤꦁ​꧊ꦄꦧꦿꦲꦩ꧀꧉꧍​

^24:16 ​꧊ꦫꦶꦧ꧀ꦏꦃꦩꦲꦸꦫꦸꦥꦤꦺꦲꦪꦸꦧꦔꦼꦠ꧀꧈​ꦲꦶꦱꦶꦃꦥꦿꦮꦤ꧀꧉​ꦝꦺꦮꦺꦏ꧀ꦏꦺꦩꦼꦝꦸꦤ꧀ꦩꦼꦚꦁꦱꦸꦩꦸꦂ꧈​ꦔꦶꦱꦺꦤ꧀ꦤꦶꦗꦸꦤꦺ꧈​ꦧꦚ꧀ꦗꦸꦂꦧꦭꦶꦩꦸꦁꦒꦃꦩꦼꦤꦺꦃ꧉​

^24:17 ꦲꦧ꧀ꦢꦶꦩꦲꦸꦲꦺꦁꦒꦭ꧀ꦲꦺꦁꦒꦭ꧀ꦩꦗꦸꦩꦼꦛꦸꦏ꧀ꦏꦏꦺꦏꦫꦺꦴꦏꦤ꧀ꦝ꧈​"​꧊ꦌꦤ꧀ꦝꦸꦏ꧀꧈​ꦩ꧀ꦧꦺꦴꦏ꧀ꦲꦏꦸꦮꦺꦤꦺꦃꦲꦤꦔꦺꦴꦩ꧀ꦧꦺꦱꦼꦛꦶꦛꦶꦏ꧀ꦱꦏꦗꦸꦤ꧀ꦩꦸ꧉"​

^24:18 ꦮꦁꦱꦸꦭ꧀ꦭꦤ꧀ꦤꦺꦧꦺꦴꦕꦃꦮꦢꦺꦴꦤ꧀ꦩꦲꦸ꧈​"ꦩꦁꦒꦥꦏ꧀꧉"​ꦗꦸꦤꦺꦤꦸꦭꦶꦲꦺꦁꦒꦭ꧀ꦢꦶꦲꦼꦝꦸꦤ꧀ꦤꦏꦺ꧈​ꦢꦶꦱꦁꦒꦔꦁꦒꦺꦴꦠꦔꦤ꧀ꦤꦺ꧈​ꦭꦤ꧀ꦮꦺꦴꦁꦔꦺꦢꦶꦠꦸꦭꦸꦁꦔꦶꦔꦺꦴꦩ꧀ꦧꦺ꧉​

^24:19 ꦱꦮꦶꦱ꧀ꦱꦺꦲꦮꦺꦃꦔꦺꦴꦩ꧀ꦧꦺ꧈​ꦧꦺꦴꦕꦃꦮꦢꦺꦴꦤ꧀ꦩꦲꦸꦤꦸꦭꦶꦩꦸꦤꦶ꧈​"ꦲꦸꦤ꧀ꦠꦱꦩ꧀ꦥꦺꦪꦤ꧀ꦧꦝꦺꦏꦸꦭꦱꦸꦏꦤꦶꦔꦺꦴꦩ꧀ꦧꦺꦥꦶꦱꦤ꧀ꦱꦠꦸꦮꦸꦏ꧀ꦏꦶꦥꦸꦤ꧀꧉"​

^24:20 ꦗꦸꦤꦺꦤꦸꦭꦶꦢꦶꦱꦸꦤ꧀ꦠꦏ꧀ꦲꦶꦁꦮꦝꦃꦱꦶꦁꦏꦁꦒꦺꦴꦔꦺꦴꦩ꧀ꦧꦺꦲꦸꦤ꧀ꦠꦲꦸꦤ꧀ꦠ꧉​ꦧꦚ꧀ꦗꦸꦂꦧꦭꦶꦩ꧀ꦭꦪꦸꦩꦼꦚꦁꦱꦸꦩꦸꦂꦔꦁꦱꦺꦴꦏ꧀ꦏꦏꦺꦲꦸꦤ꧀ꦠꦤꦺꦏꦧꦺꦃ꧉​

^24:21 ꦲꦧ꧀ꦢꦶꦩꦲꦸꦠꦤ꧀ꦱꦃꦔꦮꦱ꧀ꦱꦏꦺꦱꦥꦺꦴꦭꦃꦲꦺꦧꦺꦴꦕꦃꦮꦢꦺꦴꦤ꧀ꦏꦸꦮꦶꦏꦫꦺꦴꦱꦸꦩ꧀ꦭꦼꦔꦼꦂꦫꦼꦤ꧀꧉​ꦝꦺꦮꦺꦏ꧀ꦏꦺꦪꦏꦶꦤ꧀꧈​ꦪꦺꦤ꧀ꦪꦲꦶꦏꦶꦧꦺꦴꦕꦃꦮꦢꦺꦴꦤ꧀ꦱꦶꦁꦢꦶꦏꦼꦂꦱꦏ꧀ꦏꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃꦢꦢꦶꦗꦺꦴꦝꦺꦴꦤꦺ​꧊ꦆꦱ꧀ꦏꦏ꧀꧈​ꦧꦼꦤ꧀ꦢꦫꦤꦺ꧉​

^24:22 ꦧꦉꦁꦧꦺꦴꦕꦃꦮꦢꦺꦴꦤ꧀ꦩꦲꦸꦮꦶꦱ꧀ꦫꦩ꧀ꦥꦸꦁꦲꦼꦁꦒꦺꦴꦤꦺꦔꦺꦴꦩ꧀ꦧꦺꦤ꧀ꦤꦶꦲꦸꦤ꧀ꦠꦲꦸꦤ꧀ꦠꦏꦧꦺꦃ꧈​ꦱꦶꦲꦧ꧀ꦢꦶꦤꦸꦭꦶꦚ꧀ꦗꦸꦥꦸꦏ꧀ꦲꦤ꧀ꦠꦶꦁꦲꦤ꧀ꦠꦶꦁꦲꦼꦩꦱ꧀ꦱꦶꦁꦧꦺꦴꦧꦺꦴꦠ꧀ꦠꦺꦱꦼꦠꦼꦔꦃꦱꦺꦏꦼꦭ꧀꧈​ꦢꦶꦲꦼꦁꦒꦺꦴꦏ꧀ꦏꦏꦺꦲꦶꦁꦲꦶꦫꦸꦁꦔꦺꦧꦺꦴꦕꦃꦮꦢꦺꦴꦤ꧀ꦩꦲꦸ꧉​ꦭꦤ꧀ꦒꦼꦭꦁꦲꦼꦩꦱ꧀ꦱꦼꦥꦱꦁꦱꦶꦁꦧꦺꦴꦧꦺꦴꦠ꧀ꦠꦺꦱꦼꦥꦸꦭꦸꦃꦱꦺꦏꦼꦭ꧀ꦢꦶꦲꦼꦁꦒꦺꦴꦏ꧀ꦏꦏꦺꦲꦶꦁꦠꦔꦤ꧀ꦤꦺ;

^24:23 ꦏꦫꦺꦴꦠꦏꦺꦴꦤ꧀꧈​"​꧊ꦌꦤ꧀ꦝꦸꦏ꧀꧈​ꦏꦺꦴꦮꦺꦏꦸꦮꦶꦲꦤꦏ꧀ꦏꦺꦱꦥ?ꦲꦥꦲꦶꦁꦲꦺꦴꦩꦃꦲꦺꦧꦥꦏ꧀ꦩꦸꦲꦤꦥꦁꦒꦺꦴꦤ꧀ꦤꦤ꧀ꦱꦶꦁꦏꦼꦤꦏꦁꦒꦺꦴꦔꦶꦤꦼꦥ꧀ꦲꦏꦸꦱꦏꦚ꧀ꦕꦏꦸ?"

^24:24 ꦮꦁꦱꦸꦭ꧀ꦭꦤ꧀ꦤꦺꦧꦺꦴꦕꦃꦮꦢꦺꦴꦤ꧀ꦩꦲꦸ꧈​"ꦏꦸꦭꦩꦼꦤꦶꦏꦲꦤꦏ꧀ꦏꦶꦥꦸꦤ꧀​꧊ꦧꦺꦠꦸꦮꦺꦭ꧀꧈​ꦥꦸꦠꦸꦤꦶꦥꦸꦤ꧀​꧊ꦤꦲꦺꦴꦂꦭꦤ꧀​꧊ꦩꦶꦭ꧀ꦏ꧉​

^24:25 ꦲꦶꦁꦒꦿꦶꦪꦏꦸꦭꦏꦛꦃꦢꦩꦺꦤ꧀ꦭꦤ꧀ꦠꦼꦝꦏꦺꦮꦤ꧀꧉​ꦥꦥꦤ꧀ꦏꦁꦒꦺꦚꦶꦥꦼꦁꦲꦶꦁꦒꦶꦃꦮꦺꦴꦤ꧀ꦠꦼꦤ꧀꧉"​

^24:26 ꦲꦧ꧀ꦢꦶꦩꦲꦸꦧꦚ꧀ꦗꦸꦂꦱꦸꦩꦸꦁꦏꦼꦩ꧀ꦱꦸꦗꦸꦢ꧀ꦩꦫꦁꦔꦂꦱꦤꦺꦄꦭ꧀ꦭꦃ꧈​ꦏꦫꦺꦴꦩꦸꦚ꧀ꦗꦸꦏ꧀꧈​

^24:27 "ꦥꦶꦤꦸꦗꦶꦪꦲꦭ꧀ꦭꦃꦲꦺꦧꦼꦤ꧀ꦢꦫꦏꦸ​꧊ꦄꦧꦿꦲꦩ꧀꧈​ꦱꦶꦁꦮꦶꦱ꧀ꦔꦼꦠꦶꦔꦭ꧀ꦭꦏꦺꦱꦶꦃꦭꦤ꧀ꦏꦱꦼꦠꦾꦤꦺꦩꦫꦁꦧꦼꦤ꧀ꦢꦫꦏꦸ꧈​ꦱꦶꦁꦔꦶꦫꦶꦢ꧀ꦭꦤ꧀ꦚ꧀ꦗꦸꦗꦸꦒꦏꦺꦲꦏꦸꦲꦶꦁꦲꦺꦴꦩꦃꦲꦺꦱꦼꦢꦸꦭꦸꦂꦫꦺꦧꦼꦤ꧀ꦢꦫꦏꦸ꧉"​

^24:28 ꦧꦺꦴꦕꦃꦮꦢꦺꦴꦤ꧀ꦩꦲꦸꦩ꧀ꦭꦪꦸꦩꦸꦭꦶꦃꦭꦤ꧀ꦚꦿꦶꦠꦏ꧀ꦏꦏꦺꦊꦭꦏꦺꦴꦤꦺꦩꦫꦁꦲꦶꦧꦸꦤꦺ꧉​

^24:29 ​꧊ꦫꦶꦧ꧀ꦏꦃꦏꦸꦮꦶꦢꦸꦮꦺꦏꦏꦁ꧈​ꦗꦼꦤꦼꦁꦔꦺ​꧊ꦭꦧꦤ꧀꧉​

^24:30 ꦧꦉꦁꦏꦿꦸꦔꦸꦕꦿꦶꦠꦤꦺꦲꦝꦶꦤꦺꦭꦤ꧀ꦤ꧀ꦢꦼꦊꦁꦲꦤ꧀ꦠꦶꦁꦲꦤ꧀ꦠꦶꦁꦲꦶꦫꦸꦁꦭꦤ꧀ꦒꦼꦭꦁꦱꦶꦁꦲꦤꦲꦶꦁꦠꦔꦤ꧀ꦤꦺꦲꦝꦶꦤꦺ꧈​​꧊ꦭꦧꦤ꧀ꦲꦺꦁꦒꦭ꧀ꦲꦺꦁꦒꦭ꧀ꦩ꧀ꦭꦪꦸꦤꦼꦩꦺꦴꦤ꧀ꦤꦶꦲꦧ꧀ꦢꦶꦤꦺ​꧊ꦄꦧꦿꦲꦩ꧀꧈​ꦱꦶꦁꦲꦶꦱꦶꦃꦔꦢꦼꦒ꧀ꦲꦶꦁꦱꦕꦼꦝꦏ꧀ꦏꦺꦱꦸꦩꦸꦂ꧉​

^24:31 ​꧊ꦭꦧꦤ꧀ꦧꦚ꧀ꦗꦸꦂꦔꦗꦏ꧀ꦲꦧ꧀ꦢꦶꦩꦲꦸ꧈​ꦠꦼꦩ꧀ꦧꦸꦁꦔꦺ꧈​"ꦱꦼꦝꦺꦫꦺꦏ꧀ꦲꦶꦁꦏꦁꦏꦶꦤꦱꦶꦃ꧈​ꦩꦁꦒꦱꦩ꧀ꦥꦺꦪꦤ꧀ꦩꦩ꧀ꦥꦶꦂ꧈​ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦚ꧀ꦗꦮꦶ꧉​ꦩꦁꦒ꧈​ꦱꦩ꧀ꦥꦺꦪꦤ꧀ꦔꦱꦺꦴꦲꦶꦁꦒꦿꦶꦪꦏꦸꦭ꧉​ꦱꦩ꧀ꦥꦸꦤ꧀ꦏꦸꦭꦕꦮꦶꦱ꧀ꦱꦶꦏꦩꦂꦭꦤ꧀ꦥꦁꦒꦺꦤ꧀ꦤꦤ꧀ꦏꦁꦒꦺꦲꦸꦤ꧀ꦠꦲꦸꦤ꧀ꦠꦱꦩ꧀ꦥꦺꦪꦤ꧀꧉"​

^24:32 ꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦧꦚ꧀ꦗꦸꦂꦩ꧀ꦭꦼꦧꦸꦲꦶꦁꦲꦺꦴꦩꦃ꧉​​꧊ꦭꦧꦤ꧀ꦔꦼꦝꦸꦤ꧀ꦲꦼꦝꦸꦤ꧀ꦤꦏꦺꦩꦺꦴꦩꦺꦴꦠ꧀ꦠꦤ꧀ꦤꦺꦲꦸꦤ꧀ꦠꦲꦸꦤ꧀ꦠ꧈​ꦚ꧀ꦗꦸꦥꦸꦏ꧀ꦢꦩꦺꦤ꧀ꦏꦁꦒꦺꦴꦱ꧀ꦭꦺꦩꦺꦏ꧀ꦏꦺ꧈​ꦱꦂꦠꦥꦏꦤ꧀ꦏꦁꦒꦺꦴꦏꦺꦮꦤ꧀ꦏꦺꦮꦤ꧀ꦩꦲꦸ꧉​ꦤꦸꦭꦶꦔ꧀ꦒꦮꦧꦚꦸꦏꦁꦒꦺꦴꦮꦶꦱꦸꦃꦱꦶꦏꦶꦭ꧀ꦭꦺꦥꦫꦠꦩꦸ꧉​

^24:33 ꦤꦁꦔꦶꦁꦧꦉꦁꦢꦶꦱꦸꦒꦸꦃꦩꦁꦔꦤ꧀꧈​ꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦩꦲꦸꦏꦤ꧀ꦝꦔꦺꦤꦺ꧈​"ꦚꦸꦮꦸꦤ꧀ꦔꦥꦸꦤ꧀ꦠꦼꦤ꧀꧈​ꦏꦸꦭꦩ꧀ꦧꦺꦴꦠꦼꦤ꧀ꦧꦝꦺꦤꦼꦝ꧈​ꦩꦼꦤꦮꦶꦢꦺꦫꦺꦁꦔꦠꦸꦂꦫꦏꦼꦤ꧀ꦏꦥꦽꦭꦸꦮꦤ꧀ꦏꦸꦭ꧉"​ꦮꦁꦱꦸꦭ꧀ꦭꦤ꧀ꦤꦺ​꧊ꦭꦧꦤ꧀꧈​"ꦩꦁꦒꦱꦩ꧀ꦥꦺꦪꦤ꧀ꦕꦿꦶꦪꦺꦴꦱ꧀ꦱꦏꦼꦤ꧀꧉"​

^24:34 ꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦧꦚ꧀ꦗꦸꦂꦩꦠꦸꦂ꧈​"ꦏꦸꦭꦩꦼꦤꦶꦏꦲꦧ꧀ꦢꦶꦤꦶꦥꦸꦤ꧀​꧊ꦄꦧꦿꦲꦩ꧀꧈​

^24:35 ꦠꦶꦪꦁꦲꦶꦁꦏꦁꦧꦶꦤꦼꦂꦏꦃꦲꦤ꧀ꦱꦔꦼꦠ꧀ꦢꦺꦤꦶꦁꦄꦭ꧀ꦭꦃ꧈​ꦔꦤ꧀ꦠꦺꦴꦱ꧀ꦢꦢꦺꦴꦱ꧀ꦠꦶꦪꦁꦲꦶꦁꦏꦁꦱꦸꦒꦶꦃꦱꦔꦼꦠ꧀꧉​ꦏꦒꦸꦁꦔꦤ꧀ꦫꦗꦏꦪꦫꦸꦥꦶꦩꦺꦤ꧀ꦢꦒꦺꦩ꧀ꦧꦺꦭ꧀꧈​ꦩꦺꦤ꧀ꦢꦗꦮꦶ꧈​ꦊꦩ꧀ꦧꦸ꧈​ꦲꦸꦤ꧀ꦠ꧈​ꦏꦸꦭ꧀ꦢꦶ꧈​ꦱ꧀ꦭꦏ꧈​ꦲꦼꦩꦱ꧀꧈​ꦫꦺꦚ꧀ꦕꦁꦠꦸꦩ꧀ꦧꦱꦤ꧀ꦗꦊꦂꦭꦤ꧀ꦲꦺꦱ꧀ꦠꦿꦶ꧉​

^24:36 ​꧊ꦱꦫꦃ꧈​ꦒꦂꦮꦤꦶꦥꦸꦤ꧀꧈​ꦏꦥꦫꦶꦁꦔꦤ꧀ꦲꦤꦏ꧀ꦗꦊꦂꦤꦭꦶꦏꦱꦩ꧀ꦥꦸꦤ꧀ꦱꦼꦥꦸꦃꦱꦔꦼꦠ꧀꧉​ꦥꦿꦩꦶꦭꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀ꦩꦫꦶꦱ꧀ꦱꦏꦼꦤ꧀ꦧꦤ꧀ꦝꦤꦶꦥꦸꦤ꧀ꦱꦼꦢꦪꦝꦠꦼꦁꦲꦤꦏ꧀ꦏꦶꦥꦸꦤ꧀ꦗꦊꦂꦮꦲꦸ꧉​

^24:37 ꦏꦸꦭꦢꦶꦥꦸꦤ꧀ꦝꦮꦸꦃꦲꦶꦥꦽꦗꦚ꧀ꦗꦶꦏꦤ꧀ꦛꦶꦱꦸꦥꦲꦺꦴꦱ꧀ꦢꦺꦤꦶꦁꦧꦼꦤ꧀ꦢꦫꦏꦸꦭꦩꦼꦏꦠ꧀ꦠꦼꦤ꧀꧈​‘ꦏꦺꦴꦮꦺꦲꦗꦥꦶꦱꦤ꧀ꦥꦶꦱꦤ꧀ꦔ꧀ꦒꦺꦴꦭꦺꦏ꧀ꦏꦏꦺꦗꦺꦴꦝꦺꦴꦲꦤꦏ꧀ꦏꦸꦧꦺꦴꦕꦃꦮꦢꦺꦴꦤ꧀ꦱꦏꦠꦤꦃ​꧊ꦏꦺꦤꦲꦤ꧀꧈​

^24:38 ꦤꦁꦔꦶꦁꦒꦺꦴꦭꦺꦏ꧀ꦤꦱꦏꦲꦶꦁꦲꦤ꧀ꦠꦫꦤꦺꦱꦤꦏ꧀ꦱꦼꦢꦸꦭꦸꦂꦫꦺꦧꦥꦏ꧀ꦏꦸ꧉​ꦲꦺꦁꦒꦭ꧀ꦩꦁꦏꦠ꧀ꦠꦩꦿꦤ!’

^24:39 ꦏꦸꦭꦲꦶꦁꦒꦶꦃꦩꦠꦸꦂ꧈​‘ꦏꦢꦺꦴꦱ꧀ꦥꦸꦤ꧀ꦢꦶꦩꦼꦤꦮꦶꦭꦫꦺꦲꦺꦱ꧀ꦠꦿꦶꦮꦲꦸꦩ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦏꦸꦭꦧꦼꦏ꧀ꦠ?’

^24:40 ꦔꦤ꧀ꦢꦶꦏꦤꦶꦥꦸꦤ꧀꧈​‘ꦒꦸꦱ꧀ꦠꦶꦄꦭ꧀ꦭꦃꦱꦶꦁꦢꦏ꧀ꦧꦼꦏ꧀ꦠꦺꦤ꧀ꦤꦶꦧꦏꦭ꧀ꦔꦸꦠꦸꦱ꧀ꦩꦭꦲꦺꦏꦠ꧀ꦠꦺꦔꦶꦫꦶꦢ꧀ꦭꦏꦸꦩꦸꦭꦤ꧀ꦩ꧀ꦧꦼꦂꦏꦃꦲꦶꦏꦺꦴꦮꦺ꧈​ꦠꦼꦩꦃꦏꦺꦴꦮꦺꦧꦏꦭ꧀ꦲꦺꦴꦭꦺꦃꦒꦮꦺ꧉​ꦏꦺꦴꦮꦺꦧꦏꦭ꧀ꦔ꧀ꦒꦮꦗꦺꦴꦝꦺꦴꦤꦺꦲꦤꦏ꧀ꦏꦸꦱꦏꦲꦶꦁꦲꦤ꧀ꦠꦫꦤꦺꦱꦤꦏ꧀ꦱꦼꦢꦸꦭꦸꦂꦏꦸ꧉​

^24:41 ꦪꦺꦤ꧀ꦏꦺꦴꦮꦺꦮꦶꦱ꧀ꦩꦫꦤꦶꦱꦤꦏ꧀ꦱꦼꦢꦸꦭꦸꦂꦏꦸ꧈​ꦩꦁꦏꦏꦺꦴꦮꦺꦢꦶꦠꦩ꧀ꦥꦶꦏ꧀꧈​ꦏꦺꦴꦮꦺꦭꦒꦶꦭꦸꦮꦂꦱꦏꦱꦸꦩ꧀ꦥꦃꦩꦸ꧉’​

^24:42 ꦢꦶꦤ꧀ꦠꦼꦤ꧀ꦩꦼꦤꦶꦏꦮꦲꦸꦏꦸꦭꦢꦸꦩꦸꦒꦶꦲꦶꦁꦱꦸꦩꦸꦂ꧈​ꦭꦗꦼꦁꦤ꧀ꦢꦼꦢꦺꦴꦔꦲꦶꦁꦱꦊꦧꦼꦠ꧀ꦠꦶꦁꦧꦠꦺꦴꦱ꧀꧈​‘ꦝꦸꦃꦲꦭ꧀ꦭꦃꦲꦶꦥꦸꦤ꧀ꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧈​ꦏꦸꦭꦚꦸꦮꦸꦤ꧀ꦠꦸꦭꦸꦁꦱꦸꦥꦢꦺꦴꦱ꧀ꦭꦩ꧀ꦥꦃꦏꦸꦭꦲꦁꦱꦭ꧀ꦭꦢꦩꦼꦭ꧀꧉’​

^24:43 ꦏꦸꦭꦧꦝꦺꦔꦼꦤ꧀ꦠꦺꦴꦱ꧀ꦱꦶꦲꦶꦁꦱꦸꦩꦸꦂꦔꦿꦶꦏꦶ꧉​ꦩꦼꦤꦮꦶꦮꦺꦴꦤ꧀ꦠꦼꦤ꧀ꦭꦫꦺꦲꦺꦱ꧀ꦠꦿꦶꦝꦠꦼꦁꦔꦁꦱꦸ꧈​ꦏꦸꦭꦭꦗꦼꦁꦧꦝꦺꦤꦼꦩ꧀ꦧꦸꦁ:‘ꦩ꧀ꦧꦺꦴꦏ꧀ꦲꦏꦸꦮꦺꦤꦺꦃꦲꦤꦔꦺꦴꦩ꧀ꦧꦺꦱꦏꦲꦶꦁꦗꦸꦤ꧀ꦩꦸꦱꦼꦛꦶꦛꦶꦏ꧀ꦮꦲꦺ꧈’​

^24:44 ꦩꦁꦏꦭꦫꦺꦮꦲꦸꦭꦗꦼꦁꦩꦁꦱꦸꦭ꧀ꦭꦶ:‘ꦩꦁꦒ꧈​ꦏꦸꦭꦲꦠꦸꦂꦫꦶꦔꦺꦴꦩ꧀ꦧꦺ꧈​ꦭꦤ꧀ꦲꦸꦤ꧀ꦠꦲꦸꦤ꧀ꦠꦱꦩ꧀ꦥꦺꦪꦤ꧀ꦧꦝꦺꦏꦸꦭꦲꦺꦴꦩ꧀ꦧꦺꦤ꧀ꦤꦶꦥꦶꦱꦤ꧀꧈’​ꦩꦸꦒꦶꦩꦼꦤꦶꦏꦢꦢꦺꦴꦱ꧀ꦠꦶꦠꦶꦏ꧀ꦏꦤ꧀꧈​‘ꦧꦶꦭꦶꦃꦭꦫꦺꦲꦺꦱ꧀ꦠꦿꦶꦩꦼꦤꦶꦏꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦏꦼꦂꦱꦏ꧀ꦏꦏꦼꦤ꧀ꦢꦢꦺꦴꦱ꧀ꦗꦺꦴꦝꦺꦴꦤꦶꦥꦸꦤ꧀ꦧꦼꦤ꧀ꦢꦫꦏꦸꦭ​꧊ꦆꦱ꧀ꦏꦏ꧀꧉’​

^24:45 ꦲꦼꦁꦒꦺꦤ꧀ꦏꦸꦭꦤ꧀ꦢꦼꦢꦺꦴꦔꦱꦊꦧꦼꦠ꧀ꦠꦶꦁꦧꦠꦺꦴꦱ꧀ꦢꦺꦫꦺꦁꦫꦩ꧀ꦥꦸꦁ꧈​ꦭ꧀ꦲꦏꦺꦴꦏ꧀​꧊ꦫꦶꦧ꧀ꦏꦃꦝꦠꦼꦁꦩ꧀ꦧꦼꦏ꧀ꦠꦗꦸꦤ꧀꧈​ꦧꦝꦺꦔꦁꦱꦸꦩꦿꦶꦏꦸ꧉​ꦱꦉꦁꦩꦶꦁꦒꦃꦱꦏꦶꦁꦱꦸꦩꦸꦂꦭꦗꦼꦁꦏꦸꦭꦕꦼꦭꦏ꧀ꦏꦶꦏꦭꦶꦪꦤ꧀ꦩꦸꦔꦼꦭ꧀꧈​‘ꦩ꧀ꦧꦺꦴꦏ꧀ꦲꦏꦸꦮꦺꦤꦺꦃꦲꦤꦔꦺꦴꦩ꧀ꦧꦺꦱꦏꦲꦶꦁꦗꦸꦤ꧀ꦩꦸꦱꦼꦛꦶꦛꦶꦏ꧀ꦮꦲꦺ꧉’​

^24:46 ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦏꦺꦴꦏꦺꦁꦒꦭ꧀ꦲꦺꦁꦒꦭ꧀ꦔꦼꦝꦏ꧀ꦏꦏꦼꦤ꧀ꦗꦸꦤꦶꦥꦸꦤ꧀꧈​ꦏꦭꦶꦪꦤ꧀ꦩꦸꦔꦼꦭ꧀꧈​‘ꦩꦁꦒꦱꦩ꧀ꦥꦺꦪꦤ꧀ꦔꦺꦴꦩ꧀ꦧꦺ꧈’​ꦭꦗꦼꦁꦤꦮꦺꦤ꧀ꦤꦶꦧꦝꦺꦔꦺꦴꦩ꧀ꦧꦺꦤ꧀ꦤꦶꦲꦸꦤ꧀ꦠꦲꦸꦤ꧀ꦠꦏꦸꦭꦥꦶꦱꦤ꧀꧉​ꦏꦸꦭꦭꦗꦼꦁꦔꦺꦴꦩ꧀ꦧꦺꦭꦤ꧀ꦲꦸꦤ꧀ꦠꦲꦸꦤ꧀ꦠꦏꦸꦭꦲꦶꦁꦒꦶꦃꦭꦗꦼꦁꦢꦶꦥꦸꦤ꧀ꦲꦺꦴꦩ꧀ꦧꦺꦤ꧀ꦤꦶ꧉​

^24:47 ꦱꦼꦱꦩ꧀ꦥꦸꦤꦶꦥꦸꦤ꧀ꦩꦼꦏꦠ꧀ꦠꦼꦤ꧀ꦏꦸꦭꦭꦗꦼꦁꦠꦏꦺꦤ꧀꧈​‘ꦤ꧀ꦝꦸꦏ꧀꧈​ꦏꦺꦴꦮꦺꦏꦸꦮꦶꦲꦤꦏ꧀ꦏꦺꦱꦥ?’ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀꧈​‘ꦏꦸꦭꦲꦤꦏ꧀ꦏꦶꦥꦸꦤ꧀​꧊ꦧꦺꦠꦸꦮꦺꦭ꧀꧉​​꧊ꦧꦺꦠꦸꦮꦺꦭ꧀ꦩꦼꦤꦶꦏꦲꦤꦏ꧀ꦏꦶꦥꦸꦤ꧀​꧊ꦤꦲꦺꦴꦂꦭꦤ꧀​꧊ꦩꦶꦭ꧀ꦏ꧉’​ꦏꦸꦭꦭꦗꦼꦁꦩꦼꦤ꧀ꦝꦼꦠ꧀ꦲꦤ꧀ꦠꦶꦁꦲꦤ꧀ꦠꦶꦁꦲꦶꦫꦸꦁꦭꦤ꧀ꦒꦼꦭꦁꦲꦼꦩꦱ꧀꧈​ꦏꦸꦭꦲꦁꦒꦺꦏ꧀ꦏꦏꦼꦤ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀꧉​

^24:48 ꦩꦶꦭꦏꦸꦭꦭꦗꦼꦁꦚꦼꦩ꧀ꦧꦃꦱꦸꦗꦸꦢ꧀ꦝꦠꦼꦁꦒꦸꦱ꧀ꦠꦶꦄꦭ꧀ꦭꦃꦱꦼꦩ꧀ꦧꦃꦲꦤ꧀ꦤꦶꦥꦸꦤ꧀ꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧈​ꦢꦺꦤꦺꦱꦩ꧀ꦥꦸꦤ꧀ꦏꦼꦂꦱꦔꦶꦫꦶꦢ꧀ꦭꦩ꧀ꦥꦃꦏꦸꦭꦚ꧀ꦗꦸꦗꦸꦒ꧀ꦝꦠꦼꦁꦱꦼꦝꦺꦫꦺꦏ꧀ꦏꦶꦥꦸꦤ꧀ꦧꦼꦤ꧀ꦢꦫꦏꦸꦭ꧈​ꦠꦼꦩꦃꦱꦒꦼꦢ꧀ꦏꦼꦥꦁꦒꦶꦃꦏꦭꦶꦪꦤ꧀ꦭꦫꦺꦲꦺꦱ꧀ꦠꦿꦶꦩꦼꦤꦶꦏ꧉​

^24:49 ꦱꦩꦁꦏꦺꦩꦁꦒꦏꦸꦭꦲꦠꦸꦂꦫꦶꦔꦤ꧀ꦢꦶꦏꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦧꦝꦺꦤꦤ꧀ꦢꦸꦏ꧀ꦏꦏꦼꦤ꧀ꦏꦠꦽꦱ꧀ꦤꦤ꧀ꦭꦤ꧀ꦏꦸꦮꦗꦶꦧ꧀ꦧꦤ꧀ꦥꦚ꧀ꦗꦼꦤꦼꦁꦔꦤ꧀ꦝꦠꦼꦁꦧꦼꦤ꧀ꦢꦫꦏꦸꦭ​꧊ꦄꦧꦿꦲꦩ꧀꧈​ꦩꦼꦤꦥꦩ꧀ꦧꦺꦴꦠꦼꦤ꧀꧈​ꦱꦸꦥꦢꦺꦴꦱ꧀ꦏꦤ꧀ꦠꦼꦤ꧀ꦤꦤ꧀ꦩꦼꦤꦥꦲꦶꦁꦏꦁꦧꦝꦺꦏꦸꦭꦠꦶꦤ꧀ꦢꦏ꧀ꦏꦏꦼꦤ꧀꧉"​

^24:50 ​꧊ꦭꦧꦤ꧀ꦭꦤ꧀​꧊ꦧꦺꦠꦸꦮꦺꦭ꧀ꦧꦚ꧀ꦗꦸꦂꦩꦁꦱꦸꦭ꧀ꦭꦶ꧈​"ꦱꦫꦺꦃꦤꦺꦥꦽꦏꦮꦶꦱ꧀ꦩꦼꦤꦶꦏꦱꦩ꧀ꦥꦸꦤ꧀ꦏꦏꦼꦂꦱꦏ꧀ꦏꦏꦼꦤ꧀ꦢꦺꦤꦶꦁꦥꦔꦺꦫꦤ꧀ꦥꦶꦪꦩ꧀ꦧꦏ꧀꧈​ꦥꦿꦩꦶꦭꦏꦸꦭꦤꦩꦸꦁꦱꦩꦶꦥꦱꦿꦃ꧈​ꦤ꧀ꦝꦺꦫꦺꦏ꧀ꦲꦶꦁꦱꦏꦼꦂꦱꦤꦶꦥꦸꦤ꧀꧉​

^24:51 ꦱꦸꦩꦁꦒ꧈​ꦏꦗꦼꦁꦔꦶꦥꦸꦤ꧀​꧊ꦫꦶꦧ꧀ꦏꦃꦠꦸꦩꦸꦠ꧀ꦱꦩ꧀ꦥꦺꦪꦤ꧀ꦭꦤ꧀ꦏꦗꦺꦴꦝꦺꦴꦏ꧀ꦏꦏꦼꦤ꧀ꦏꦭꦶꦪꦤ꧀ꦥꦸꦠꦿꦤꦶꦥꦸꦤ꧀ꦧꦼꦤ꧀ꦢꦫꦱꦩ꧀ꦥꦺꦪꦤ꧀꧈​ꦏꦢꦺꦴꦱ꧀ꦲꦶꦁꦏꦁꦏꦝꦮꦸꦃꦲꦏꦼꦤ꧀ꦢꦺꦤꦶꦁꦥꦔꦺꦫꦤ꧀꧉"​

^24:52 ꦧꦉꦁꦏꦿꦸꦔꦸꦮꦁꦱꦸꦭ꧀ꦭꦤ꧀ꦱꦶꦁꦩꦼꦁꦏꦺꦴꦤꦺꦴꦩꦲꦸꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦧꦚ꧀ꦗꦸꦂꦱꦸꦗꦸꦢ꧀ꦚꦼꦩ꧀ꦧꦃꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​

^24:53 ꦲꦧ꧀ꦢꦶꦩꦲꦸꦤꦸꦭꦶꦔꦼꦠꦺꦴꦏ꧀ꦏꦏꦺꦱꦤ꧀ꦝꦁꦔꦤ꧀ꦭꦤ꧀ꦉꦉꦁꦒꦤ꧀ꦲꦼꦩꦱ꧀ꦭꦤ꧀ꦱ꧀ꦭꦏ꧈​ꦢꦶꦮꦺꦤꦺꦃꦲꦏꦺꦩꦫꦁ​꧊ꦫꦶꦧ꧀ꦏꦃ꧉​ꦱꦼꦩꦺꦴꦤꦺꦴꦲꦸꦒꦏꦏꦁꦤꦺꦭꦤ꧀ꦲꦶꦧꦸꦤꦺꦥꦝꦢꦶꦲꦠꦸꦂꦫꦶꦧꦫꦁꦧꦫꦁꦱꦶꦁꦭꦫꦁꦉꦒꦤꦺ꧉​

^24:54 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦭꦤ꧀ꦏꦚ꧀ꦕꦏꦚ꧀ꦕꦤꦺꦭꦒꦶꦥꦝꦒꦼꦊꦩ꧀ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ꧈​ꦱꦂꦠꦔꦶꦤꦼꦥ꧀ꦲꦤꦲꦶꦁꦲꦺꦴꦩꦃꦏꦺꦴꦤꦺꦴ꧉​ꦲꦺꦱꦸꦏ꧀ꦏꦺ꧈​ꦱꦮꦶꦱ꧀ꦱꦺꦥꦝꦠꦔꦶ꧈​ꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦤꦸꦭꦶꦏꦤ꧀ꦝꦏꦫꦺꦴꦱꦶꦁꦢꦸꦮꦺꦲꦺꦴꦩꦃ꧈​"ꦏꦼꦥꦉꦁꦔꦏꦸꦭꦱꦩꦼꦤꦶꦏꦩꦤ꧀ꦠꦸꦏ꧀ꦝꦠꦼꦁꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦧꦼꦤ꧀ꦢꦫꦏꦸꦭ꧉"​

^24:55 ꦤꦁꦔꦶꦁꦏꦏꦁꦤꦺꦭꦤ꧀ꦲꦶꦧꦸꦤꦺ​꧊ꦫꦶꦧ꧀ꦏꦃꦏꦤ꧀ꦝ꧈​"ꦩ꧀ꦧꦺꦴꦏ꧀ꦔꦼꦤ꧀ꦠꦺꦴꦱ꧀ꦱꦶꦱꦼꦩꦶꦁꦒꦸꦲꦸꦠꦮꦶꦱꦼꦢꦱꦢꦶꦤ꧀ꦠꦼꦤ꧀ꦩꦭꦶꦃ;ꦱꦼꦱꦩ꧀ꦥꦸꦤꦶꦥꦸꦤ꧀ꦩꦼꦤꦶꦏꦏꦗꦼꦁꦔꦶꦥꦸꦤ꧀​꧊ꦫꦶꦧ꧀ꦏꦃꦠꦸꦩꦸꦠ꧀꧉"​

^24:56 ꦤꦁꦔꦶꦁꦲꦧ꧀ꦢꦶꦩꦲꦸꦩꦠꦸꦂ꧈​"ꦏꦸꦭꦱꦩ꧀ꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦒꦺꦴꦤ꧀ꦝꦺꦭ꧀ꦭꦶ꧉​ꦥꦔꦺꦫꦤ꧀ꦱꦩ꧀ꦥꦸꦤ꧀ꦔ꧀ꦭꦼꦱ꧀ꦠꦤ꧀ꦠꦸꦤ꧀ꦤꦏꦼꦤ꧀ꦭꦩ꧀ꦥꦃꦏꦸꦭ꧈​ꦩꦶꦭꦏꦼꦥꦉꦁꦔꦏꦸꦭꦠꦸꦩꦸꦤ꧀ꦠꦼꦤ꧀ꦧꦶꦝꦭ꧀꧈​ꦩꦤ꧀ꦠꦸꦏ꧀ꦝꦠꦼꦁꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦧꦼꦤ꧀ꦢꦫꦏꦸꦭ꧉"​

^24:57 ꦧꦚ꧀ꦗꦸꦂꦢꦶꦮꦁꦱꦸꦭ꧀ꦭꦶ꧈​"ꦱꦲꦺꦤꦶꦥꦸꦤ꧀ꦏꦸꦭꦤꦤ꧀ꦠꦸꦤ꧀ꦝꦠꦼꦁ​꧊ꦫꦶꦧ꧀ꦏꦃꦥꦶꦪꦩ꧀ꦧꦏ꧀ꦫꦸꦩꦶꦪꦶꦤ꧀꧈​ꦏꦢꦺꦴꦱ꧀ꦥꦸꦤ꧀ꦢꦶꦥꦼꦩꦁꦒꦶꦃꦲꦶꦥꦸꦤ꧀꧉"​

^24:58 ​꧊ꦫꦶꦧ꧀ꦏꦃꦤꦸꦭꦶꦢꦶꦲꦸꦤ꧀ꦢꦁꦭꦤ꧀ꦢꦶꦠꦫꦶ꧈​"ꦲꦥꦏꦺꦴꦮꦺꦒꦼꦊꦩ꧀ꦢꦶꦲꦗꦏ꧀ꦧꦸꦝꦭ꧀ꦱꦲꦶꦏꦶ?"ꦮꦁꦱꦸꦭ꧀ꦭꦤ꧀ꦤꦺ꧈​"ꦲꦶꦁꦒꦶꦃ꧈​ꦥꦸꦫꦸꦤ꧀꧉"​

^24:59 ​꧊ꦫꦶꦧ꧀ꦏꦃꦤꦸꦭꦶꦢꦶꦭꦶꦭꦤꦶꦧꦸꦝꦭ꧀꧈​ꦧꦉꦁꦏꦫꦺꦴꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦱꦏꦚ꧀ꦕꦤꦺ꧈​ꦢꦶꦏꦤ꧀ꦛꦺꦤ꧀ꦤꦶꦥꦩꦺꦴꦩꦺꦴꦁꦔꦺ꧉​

^24:60 ​꧊ꦫꦶꦧ꧀ꦏꦃꦢꦶꦧꦼꦂꦏꦃꦲꦶꦢꦺꦤꦶꦁꦏꦏꦁꦭꦤ꧀ꦲꦶꦧꦸꦤꦺꦩꦼꦁꦏꦺꦤꦺ꧈​"​꧊ꦫꦶꦧ꧀ꦏꦃ꧈​ꦩꦸꦒꦩꦸꦒꦏꦺꦴꦮꦺꦏꦥꦫꦶꦁꦔꦤꦠꦸꦫꦸꦤ꧀ꦩꦪꦸꦠꦪꦸꦠ!ꦩꦸꦒꦩꦸꦒꦠꦼꦝꦏ꧀ꦠꦸꦫꦸꦤ꧀ꦩꦸꦤꦼꦭꦸꦏ꧀ꦏꦏꦺꦭꦤ꧀ꦔ꧀ꦮꦱꦤꦶꦏꦸꦛꦏꦸꦛꦤꦺꦩꦸꦁꦱꦸꦃꦲꦺ꧉"​

^24:61 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ꧈​​꧊ꦫꦶꦧ꧀ꦏꦃꦭꦤ꧀ꦥꦫꦫꦺꦮꦁꦔꦺꦮꦢꦺꦴꦤ꧀ꦧꦚ꧀ꦗꦸꦂꦥꦝꦠꦠꦠꦠꦭꦤ꧀ꦧꦸꦝꦭ꧀ꦤꦸꦁꦒꦁꦲꦸꦤ꧀ꦠꦩꦺꦭꦸꦲꦧ꧀ꦢꦶꦤꦺ​꧊ꦄꦧꦿꦲꦩ꧀꧉​

^24:62 ꦏꦺꦴꦕꦥ꧀ꦥ​꧊ꦆꦱ꧀ꦏꦏ꧀ꦩꦼꦤ꧀ꦠꦱ꧀ꦧꦭꦶꦱꦏꦲꦭꦱ꧀꧈​ꦭꦶꦮꦠ꧀ꦱꦸꦩꦸꦂ​꧊ꦭꦏꦲꦶ​꧊ꦫꦺꦴꦲꦶ꧈​ꦩꦼꦂꦒꦤꦭꦶꦏꦱꦼꦩꦺꦴꦤꦺꦴꦝꦺꦮꦺꦏ꧀ꦏꦺꦩꦁꦒꦺꦴꦤ꧀ꦲꦶꦁꦠꦤꦃ​꧊ꦏꦺꦤꦲꦤ꧀ꦱꦶꦱꦶꦃ​꧊ꦏꦶꦢꦸꦭ꧀꧉​

^24:63 ꦔꦉꦥ꧀ꦥꦏꦺꦱꦸꦫꦸꦥ꧀꧈​​꧊ꦆꦱ꧀ꦏꦏ꧀ꦩꦼꦠꦸꦱꦏꦏꦺꦩꦃꦲꦉꦥ꧀ꦩ꧀ꦭꦏꦸꦩ꧀ꦭꦏꦸꦲꦶꦁꦲꦫꦲꦫꦱꦩꦸꦤ꧀ꦒꦺꦴꦭꦺꦏ꧀ꦲꦮꦱꦼꦒꦼꦂ꧉​ꦢꦸꦩꦢꦏ꧀ꦏꦤ꧀ꦮꦼꦫꦸꦃꦲꦶꦫꦶꦁꦲꦶꦫꦶꦁꦔꦤ꧀ꦲꦸꦤ꧀ꦠꦠꦼꦏ꧉​

^24:64 ꦧꦉꦁ​꧊ꦫꦶꦧ꧀ꦏꦃꦮꦼꦫꦸꦃ​꧊ꦆꦱ꧀ꦏꦏ꧀꧈​ꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦩꦼꦝꦸꦤ꧀ꦱꦏꦲꦸꦤ꧀ꦠꦤꦺ꧈​

^24:65 ꦱꦂꦠꦠꦏꦺꦴꦤ꧀ꦏꦫꦺꦴꦲꦧ꧀ꦢꦶꦤꦺ​꧊ꦄꦧꦿꦲꦩ꧀꧈​"ꦠꦶꦪꦁꦗꦊꦂꦲꦶꦁꦏꦁꦩꦼꦛꦸꦏ꧀ꦏꦏꦼꦤ꧀ꦏꦶꦠꦩꦼꦤꦶꦏꦱꦶꦤ꧀ꦠꦼꦤ꧀?"ꦮꦁꦱꦸꦭ꧀ꦭꦤ꧀ꦤꦺꦲꦧ꧀ꦢꦶꦩꦲꦸ꧈​"ꦲꦶꦁꦒꦶꦃꦩꦼꦤꦶꦏꦧꦼꦤ꧀ꦢꦫꦏꦸꦭ​꧊ꦆꦱ꧀ꦏꦏ꧀꧉"​​꧊ꦫꦶꦧ꧀ꦏꦃꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦚ꧀ꦗꦸꦥꦸꦏ꧀ꦏꦿꦸꦝꦸꦁꦔꦺꦏꦁꦒꦺꦴꦤꦸꦠꦸꦥ꧀ꦥꦶꦫꦲꦶꦤꦺ꧉​

^24:66 ꦲꦧ꧀ꦢꦶꦤꦺ​꧊ꦄꦧꦿꦲꦩ꧀ꦩꦲꦸꦤꦸꦭꦶꦚꦿꦶꦠꦏ꧀ꦏꦏꦺꦊꦭꦏꦺꦴꦤꦺꦏꦧꦺꦃꦩꦫꦁ​꧊ꦆꦱ꧀ꦏꦏ꧀꧉​

^24:67 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦔꦗꦏ꧀​꧊ꦫꦶꦧ꧀ꦏꦃ꧈​ꦢꦶꦒꦮꦩ꧀ꦭꦼꦧꦸꦩꦼꦚꦁꦏꦺꦩꦃꦲꦺ​꧊ꦱꦫꦃ꧈​ꦲꦶꦧꦸꦤꦺ꧈​ꦱꦂꦠꦱꦧꦚ꧀ꦗꦸꦂꦫꦺꦢꦢꦶꦧꦺꦴꦗꦺꦴꦤꦺ꧉​​꧊ꦆꦱ꧀ꦏꦏ꧀ꦠꦽꦱ꧀ꦤꦧꦔꦼꦠ꧀ꦩꦫꦁ​꧊ꦫꦶꦧ꧀ꦏꦃ꧈​ꦭꦤ꧀ꦢꦢꦶꦥꦔ꧀ꦭꦶꦥꦸꦂꦱꦮꦶꦱ꧀ꦱꦺꦢꦶꦠꦶꦁꦒꦭ꧀ꦩꦠꦶꦲꦶꦧꦸꦤꦺ꧉​